بشارت سسي نه سمادن گلور

دوشنبه 12 اسفند 1392

+0 به يه ن
نام شاعر : كلامي زنجاني

بشارت سسي نه سمادن گلور
يره مژده عرش خدادن گلور
خبر خاتم النبيادن گلور
گلن كيمدي سير صفادن گلور
محمدي كوه حرادن گلور

بودور برترين پيشوا امته
مقدس وجودي سبب خلقته
اتوب كثرتي يول تاپوب وحدته
چاتار كيم الين ئوپسه امنيته

دله قدرت اول دلربادن گلور
محمدي كوه حرادن گلور

نزول آسماندا ايدوب پيك حق
دلينده گوزل سوره آدي علق
اوخور بسم رب مفخر ماخلق
يره نور رحمت توكور نه طبق

چهل ساله سالك دعادن گلور
محمدي كوه حرادن گلور

نه موسي نه عيسي نه يونسدي بو
دل خلق بي ياره مونسدي بو
ستاره ديمه ماه مجلسدي بو
گر امي ده اولسا مدرسدي بو

كه دانشگه لا يرادن گلور
محمدي كوه حرادن گلور

نگاريم منيم گيتمه ميش مكتبه
چاتوب معرفتده اوجا منصبه
اولوب عاشق عالم او خال لبه
سالوب ذكري عشاقي تاب و تبه

دله شور او بانگ رسادن گلور
محمدي كوه حرادن گلور

گلور بت شكن بتلاري سينديرا
گلور محبط وحيه پرچم وورا
قباقينده وار كيمده قدرت دورا
تيدور افتخار عرشه ام القرا

نوا مروه دن هم صفادن گلور
محمدي كوه حرادن گلور

خدايا بو مشعل خموش اولماسين
يانا سينه سي درده توش اولماسين
جوشان چشمه سي بي خروش اولماسين
اوركده نيجه جنب و جوش اولماسين

كه يار عالم كبريادن گلور
محمدي كوه حرادن گلور




بؤلوم : حضرت نبي مكرم اسلام(ص) یازار : hasanfatemefard 7 باخیش

گلوبدي بيرگون علي گوردي رو به قبله ياتوب

دوشنبه 12 اسفند 1392

+0 به يه ن
نام شاعر : مرحوم حاج حيدر شبگرد(خوندل)

گلوبدي بيرگون علي گوردي رو به قبله ياتوب
كسوب علاقه بدندن قواي جسماني

گورنده بي حركت همسرين او سرور دين
نه حاله قالدي بولر اهل دل او معناني

بو نيّتيله او خاموشي بير دانيشديرسون
گلوب تكلّمه بو سوزلر اولدي عنواني

خطاب ايدوب كه دور اي قائد الصّلاه قيزي
رعايت ايت بو عليّ غريب و تنهاني

ديدي دوباره دور اي حامل زكات قيزي
گوزون فداسي گوز آچ ايتمه نقض پيماني

اوچومجي دفعه بويوردي عم اوغلوام زهرا
قسم علاقوه رد ايتمه بو تمناني

ندا نداي علي فاطمه جواب ويرن
منم كه مشكله سالام بو امر آساني

بو سوزده گوزلرين آچدي بتول نازيله
تبسميله ايدوب شاد او غملي مولاني

ديدي عم اوغلي بيله آغلاما سنه قربان
گوزموده گوندوزومي ايتمه ليل ظلماني

حيات و مرگي كناريمده روبه رو گورورم
گل اي كرامتي عاجز قويان مسيحاني

بهشتيدن مني دنيايه ايلدون معطوف
زيارتوندن اولار بو نقصه جبراني

هزار روضه ي رضوان فداسي بير نگهون
گورر دل اهلي جمالوندا بسط عرفاني

سن اولماسان نه بهشت و نه كوثر و نه قصور
تاپار سنيله صفا خلد حور غلماني

جلال بارقه ي ذوالجلالي سنده گورر
ويرر كليمه تجلاي طور سيناني

سنه مطيع اوامردي قابض الارواح
اطاعت امريوه ايلر او پيك رحماني

گلوبدي منتقل ايتسون مني بو عالمدن
بقايه چونكه بو عالمدي عالم فاني

ولي فراقيم اگر سخت مشكل اولسا سنه
حضوريون منه وار مين بهشت رجحاني

سن اولماسان منه سن سيز بهشت اولار زندان
بتول نيلوري سن سيز بهشت رضواني

عم اوغلي امر سنون دور نه اولسا منظورون
اواليمون سنه وار بير خضوع شاياني

اگر بو مرحله ده خواهشون حياتيم دي
بتول جانيله اجرا ايدر او فرماني

عم اوغلي من سني ترك ايتماقيم دگل آسان
بو آيريليق دگي بير روح ترك ايدر جاني

حسينيله حسنون زينبيله كلثومون
من اولماسام اولارين كيم اولار نگهباني

بو قدر آغلاما آغلار گوزون فداسي اولوم
ايدر گوزون ياشي شرمنده بحر عمّاني

حيات چشمه سي جاريدي هر دمونده ولي
يازوب فنايه قلم كل من عليهاني

اجازه ويرسن اگر چوخ يورولموشام منده
 گيدوب بهشتده اولّام رسول مهماني

بويوردي فاطمه بير اود آليشديروب دلده
فراق سوزي آشوب حدّ و مرز طغياني

فقط بو گوز ياشي هر دم ايدر اوني خاموش
بولر فراقه گرفتار اولان بو ايماني

چتيندي داغ جوان ليك سخت تر بولورم
خدايه آند اولا من فرقت احبّاني

بو آيريليق ايله بير اودّدي حشره تك سونمز
يانار يانار كول ايلر يانديرار تن و جاني

غميم هميشه ليق اولدي سنون فراقوندا
سزادي اشكيم ايده شرمسار دريان

اولار بو سرّ گجه ياتميانلارا روشن
نيه منه گيجه لر اولدي ليل ظلماني




بؤلوم : حضرت زهرا(س) یازار : hasanfatemefard 0 باخیش

وا حسرتا آيردي اجل ياري ياريدن

دوشنبه 12 اسفند 1392

+0 به يه ن
نام شاعر : مرحوم حيدر شبگرد(خوندل)

وا حسرتا آيردي اجل ياري ياريدن
زهراني آلدي حقي گيدن شهرياريدن

ايتميشدي چون وصيت اوزي ويردي غسليني
دفنين ايشيت قلمده اولان انتساريدن

زهراني تا يتورديله قبرين كنارينه
باخدي مزاره ساقي كوثر كناريدن

توكدي عذاره گوز ياشيني ياندي آغلادي
بير آه سرد چكدي دل داغداريدن

امر ايلدي جريده لري ايتديلر خموش
كام آلدي شب او سرور شب زنده داريدن

شهر مدينه خلوت و خاموش و بي فروغ
عالم سكوت محض شب مرگباريدن

محبوس سينه لرده نفسلر نه وار مگر
كيم آيريلور او دامگه مستعاريدن

آغلاديلار صحابه ولي شمع تك خموش
آلميشدي مشق گوزلري ابر بهاريدن

سلمانيدي اباذر و مقداد بولمورم
تشييع ايدن او بانوي والا تباريدن

قبرين كنارينه يتوروب قويدولار يره
افسرده دل او حادثه ناگواريدن

امر ايلدي امام كه مندن كنار اولون
يوز دوندرون بو درد و غمي بي شماريدن

پيغمبرين قيزين من اوزوم قبره تاپشوروم
پيغمبري خلاص ايليوم انتظاريدن

امر امامه ايلدي اصحاب امتثال
آيريلديلار او محفل پر آه و زاريدن

تا بزم راز خلوت اولوب غير قالمادي
آيريلدي صبر و تاب او شه بردباريدن

بير قالدي نعش فاطمه بير مرتضي علي
درياي صبري سالدي بو غم اختياريدن

حسرتله باخدي بير او يارالي جنازيه
آخدي سرشگي ديده گوهر نثاريدن

گوردي خزان لهيبي ايله سولدوروب گلين
ذوق و صفا غلاقه كسوب لاله زاريدن

بير قدر درد دل ديدي بير قدر آغلادي
اسگيلمدي شراري دل پر شراريدن

زهراني بير محبتيله باسدي باغرينا
هجرانه توشه اخذ ايلدي وصل ياريدن

بيرده سيخيلدي بير بيرينه داغلي سينه لر
آيريلدي آيريلانمادي مولا فشاريدن

سسلندي قالدي فاطمه ديدار محشره
بو آير يليق عليني سالار اعتباريدن

ايكاش اجل گلوب مني ده راحت ايليه
سن سيز نه خير عالم ناپايداريدن

دنيايه باخ علي ئولومون آرزو ايدير
فرياد گردش فلك كج مداريدن

زهرا جنازه سي نيه گيزلينجه دفن اولور
بولمنز هامي بو سري سوروش هوشياريدن

دشمن هراسي بير نچه مخطور ناگوار
خيبر شكن عليني سالوب اقتداريدن

مجبور اولوب بتوليدن اوز الفتين كسوب
مرگ ايتدي عندليب گلي جور خاريدن

آغ زلفي سولان يوزوني قويدي تپراقا
تار اولدي روزگار علي شام تاريدن

فرمايش ايتدي فاطمه شرمنده ام اوزوم
مجروح سينه دن بدن زخمداريدن

بير خواهشيم بودور كه عليني گذشت ايله
چوخ دردسر يتوب سنه بو شرمساريدن

سن مندن اوتري جانيوي سالدون بلالره
چكدون او قدر رنج و اذيت شراريدن

دويدون حياتيدن اوزيوه ايستدون اولوم
هر بير فريضه دن صورا پروردگاريدن

گيتدون اوزون عم اوغلوي قويدون شكسته دل
هجرون قرار آلار بو دل بيقراريدن

پيغمبرين حضورينه مندن يتور سلام
عرض ارادت ايت بو ملول و فگاريدن

عرض ايله غصب اولوندي جفائيله حقيميز
آگاه قيل او شاهي سرانجام كاريدن

هر شكوه يا گلايه آپارسان آپار ولي
هرگز آپارما اد ستم آشكاريدن

سيلي حكايتين در و ديوار صحبتين
مستور ساخلاسن او شه تاجداريدن

كشف ايتمه اسدي گلشنه باد جفاي خار
بير غنچه پرپر اولدي بيزيم شاخساريدن

اما ديسن دي من ايله دلدن سيزيلدارام
آلديم توان و طاقتي هر رهگذاريدن

آخر ايويمده آغلاماقا مانع اولدولار
صحراني اختيار ايلديم اضطراريدن

تنگ ايتديلر بو وسعتيله ير يوزون منه
كسديم علاقه جبريله دار و دياريدن

گلديم حضوريوه بوله سن سرگذشتيمي
باخسان يارالي جسميمه نيلي عذاريدن

امت رعايت ايتمدي شرط امانتي
گويا يوخيدي واهمه روز شماريدن

((خوندل)) بولار ذخيره دي فرداي محشره
نه شعريدن حساب ايله نه شاهكاريدن

*
به قول مرحوم حاج حميد طهباز يك مورد از اين اشعار را خوندل براي ايشان سروده بودند .

فريضه دن صورا هر گون ديردي يا الله
يورولموشام منه خوشدور بو عمر پاياني

عنايت ايله خدايا وفاتيمي ياخون ايت
جهاني نيلورم اي عالمين جهانباني

دعاي فاطمه اولدي اجابته مقرون
چكوبدي بستر مرگه او روح ايماني

او نازنين بدني غصّه لر ايله اريدوب
شبيه ايدوبدي هلاله او ماه رخشاني




بؤلوم : حضرت زهرا(س) یازار : hasanfatemefard 0 باخیش

اي مقدّس بارگاهي عرش اعلادن گوزل

دوشنبه 12 اسفند 1392

+0 به يه ن
نام شاعر : اعظمي تبريزي

اي مقدّس بارگاهي عرش اعلادن گوزل
قبرينون عطري دم جانبخش عيسادن گوزل

اي همايون شهريار ملك تسليم و رضا
افتخار طوس سلطان سريرِ ارتضا
وي رضا هر بير قضايه نازنين آدي رضا
تربتون الحق اولور عالمده ديبادن گوزل

فيض آلار اي فيض حق عالمده قبروندن نفوس
مِهر و مَه اي پرتو نور جماليندن عكوس
اولميوب بي خود جهاندا شهرتون شمسُ الشّموس
طلعتون مين آفتاب عالم آرادن گوزل

اي جمالي مظهر اوصاف حيِّ ذوالجلال
ريزه خوار خوان فضلوندور هامي اهل كمال
گون يوزون گورسه قبول ايلر حجاب انفعال
اي سواد تار زلفي ليل يلدادن گوزل

گر ايلر بلبل گُلي، پروانه شمعي جستجو
كعبه ي عشّقدور امّا بو قبر مشك بو
گورسه هر كيم قبروي، ايتمز بهشتي آرزو
اي همايون، مدفني فردوس اعلادن گوزل

اي كلام ا... ناطق وي كليمه مقتدا
وي غبار آستاني چشم حوره توتيا
ظلِّ ممدود الهي قبله ي اهل ولا
واردي آسايش سنون يانونده طوبادن گوزل

چون سني ممتاز ايدوب لطفيله خلّاق عليم
اولميوب اولماز مقامون درك ايده عقل سليم
سيّدي محو كلام دل نشينون مين كليم
نور رخسارون يدِ بيضاي موسادن گوزل

گرچه مين بير آدلانوب عالمده حيِّ لايُري
مجتمعدور بير رضا لفظينده آنلار آشنا
اسم اعظمدور آدون اي اسم پاكي كيميا
هاردا وار بو اسميدن يا بو مُسَمّادَن گوزل

سن او شه سن قبروه شاه و گدا پابوس اولار
گورمه سه هر كيم مزارون آهيله مانوس اولار
گلسه بو درگاهه سائل مگر مايوس اولار؟
اي گُوي آلتندا رواقي چرخ مينادن گوزل

بو جلاليله كه دنياني دوتوبدور شهرتون
اهل عشقي آغلادار امّا ملال غربتون
هر گوگلده وار تمنّاي شميم تربتون
اولميوب اولماز تمنّا بو تمنّادن گوزل

ذكر اولاندا غربتون اي يادگار مصطفي
طاقت و آراميمي الدن آلور بير ماجرا
گوزلريمده ايلوري جلوه ديار كربلا
جنّةُ المَاوي يقين اولماز او صحرادن گوزل

گرچه سن غربتده جان ويردون غريب و دل فكار
قويمادي اوغلون گنه آخر نفسده انتظار
باشوي گلدي ديز اوسته آلدي اولدي كامگار
سنده آلدون كام دل اول ماه سيمادن گوزل

قانه باتمشدي ولي جدّون حسينون اكبري
نه واريدي بير هواداري نه يار و ياوري
حسرتيله صاق صولا حيران باخاردي گوزلري
منتظر بير انتظار اولماز او مولادن گوزل

باخمادي تخمير اولوبدور عشقيله آب و گلي
لشكر اشراريدن آيريلدي ناگه قاتلي
تاپدي گرداب محبّتده شه دريا دلي
گوردي بير قان دجله سي، اولماز او دريادن گوزل

بيرده گلدي خيمه گَهدن زينب عالي تبار
گوردي زهرانون گُلِ آغوشني مجروح خار
دوتدي قاتل خنجريندن ايلدي ايثار ثار
كيم مواسات ايليوب بو دخت زهرادن گوزل

بير گئجه صدّيقه ي كبري بتولين ماتمي
تاپدي دورت احباب بير محفلده الفت عالمي
تا او بزم شور و وحدت ايچره خوندل اعظمي
يازديلار بير شعر هر اشعار زيبادن گوزل


آچار سؤزلر : گوزل,


بؤلوم : امام رضا(ع) یازار : hasanfatemefard 0 باخیش

عليدور پيرو قرآن، عليدور رهبر اسلام

دوشنبه 12 اسفند 1392

+0 به يه ن
نام شاعر : اعظمي تبريزي


عليدور پيرو قرآن، عليدور رهبر اسلام
عليدور عزّت عالم، عليدور مفخر اسلام

عليدور شير بي پروا، عليدور مرد بي همتا
عليدور حكمته دارا، عليدور صبريده دريا
عليدور هيكل تقوا، عليدور عالمه مولا
عليدور ساقي كوثر، عليدور رهبر اسلام

عليدور آيت خلّاق، عليدور آيته مصداق
عليدور مصحفه اوراق، عليدور منشا اخلاق
عليدور بخشش و ارفاق، عليدور چشمه ي ميثاق
عليدور منظر طاها، عليدور مظهر اسلام

عليدور منبع ايمان، عليدور ناطق قرآن
عليدور علم بي پايان، عليدور خالقه برهان
عليدور دينه پشتيبان، عليدور شافع عصيان
عليدور كشتي عزّت، عليدور لنگر اسلام

عليدور بازوي قدرت، عليدور مخزن صولت
عليدور معدن غيرت، عليدور سايه ي رحمت
عليدور مايه ي عزّت، عليدور عالمه زينت
عليدور محرم اسرار، عليدور ياور اسلام

عليدور حق درگاهي، عليدور تخت دين شاهي
عليدور گيزلدن آهي، عليدور گوسترن راهي
عليدور چرخ دين ماهي، عليدور عالمين جاهي
عليدور دينون اجلالي، عليدور زيور اسلام

عليدور بحر بي ساحل، عليدور لايق و قابل
عليدور كامل و فاضل، عليدور علمينه عامل
عليدور حاكم عادل، عليدور مقصده نائل
عليدور دينه پرچمدار، عليدور مفخر اسلام

عليدور آيه ي تطهير، عليدور نغمه ي تكبير
عليدور صاحب شمشير، عليدور جنگيده چون شير
عليدور دشمنه زنجير، عليدور قابل تقدير
عليدور شخصيتين تعريف ايدوب پيغمبر اسلام

علي هر امره لايق دور، علي جمع علايق دور
علي فخر خلايق دور، علي درس حقايق دور
علي حقّه موافق دور، علي خصم منافق دور
اونون تيغيله تا فاتح اولوبدور لشكر اسلام

علي بير نور واحددور، علي سرّ عقايددور
علي مرد مجاهددور، علي عابددي زاهددور
علي فيض مشاهددور، علي زيب مساجددور
عليدور روح پيغمبر، عليدور پيكر اسلام

علي شمس امامت دور، علي ماه عدالت دور
علي دُرّ بلاغت دور، علي گنج فصاحت دور
علي نور هدايت دور، علي كان شجاعت دور
عليدور قلعه ي همّت، عليدور سنگر اسلام

علي يار محمّددور، علي اولاي مسنددور
علي معناي ابجددور، علي اعرازي سرمددور
علي لفظ مويّددور، علي احسانه اجوددور
عليدور آيت قهّار، عليدور سرور اسلام

علي موجود اطيب دور، علي اركان مذهب دور
علي فرخنده منصب دور، علي درگاه مطلب دور
علي زنده دل شب دور، علي استاد زينب دور
گيدوب شامه قولي باغلي باشندا معجر اسلام

علي ذكري اولوب يا حق، علي حقدن اولوب مشتق
علي باشدان اولوب منشق، علي دينه ويروب رونق
علي كونه ووروب بيدق، علي ايتدي مدد مطلق
بو شعري اعظمي آدلي يازوب بير نوكر اسلام


آچار سؤزلر : اسلام,


بؤلوم : امام علي(ع) یازار : hasanfatemefard 0 باخیش

خيمه دن دخت علي گورديلر ميدانه گلور

دوشنبه 12 اسفند 1392

+0 به يه ن
نام شاعر : اعظمي تبريزي

خيمه دن دخت علي گورديلر ميدانه گلور
ديه سن يانماقا اوز شمعنه پروانه گلور
خيمه دن دخت علي گورديلر ميدانه گلور
ديه سن يانماقا اوز شمعنه پروانه گلور

كوفه ده قانه باتان گون آتاسي شير خدا
مسجده گيتماقنا مانع اولوب شرم و حيا
كربلاده نه دور علّت بو دُرِ كنز حيا
اللري باشدا گيدير خيميه ميدانه گلور

گون كيمي اولدي عيان شرق خيمدن او زمان
يوز قويوب قتلگهه دخت شهنشاه جهان
زينبين عشقنه حيرتده قالوب كون و مكان
شير تك رزمگهه بسكه دليرانه گلور

اوج صبر اُسته وفا پرچمي همّتله ساچور
دلده كي عشق دليلي رهِ مقصودي آچور
اللرين باشه قويوب گاهي يِرور، گاهي قاچور
اود سالور نه فلكه ايله يانا يانه گلور

دلده كي عشقيني عالملره اعلان ويروري
قلب مجروحي گوتوردوقجه قدم، قان ويروري
گوروري قارداشي ميداندا سوسوز جان ويروري
اشكيله سو سپه لعل شَهِ عطشانه گلور

سعي ايدور قارداشنا بلكه اوزين تيز يتوره
دلده هجران ياراسين مرهم وصلي بتوره
دختر شير خدادور، اوزين حاشا ايتوره
عرصه گاهه ايله زهرا قيزي مردانه گلور

سانما بير ذرّه وقارين پوزوب اول گوهر پاك
كوكب برج شهامتدي ديمه ايلوري باك
حالي پوزقوندي ياخوندور ايلسون غصّه هلاك
پوزقون احواليني هر كيم گورور افغانه گلور

روز امّيد آچان وقتده تيره شبه يول
اوزيني لشكره ووردي آچا تا مطلبه يول
گوردي بو حالي قشون اهلي آچوب زينبه يول
بولدولر عشق شراري سالوب اود جانه گلور

بير بيره سويلدي بو فاطمه ريحانه سيدور
گورموسوز باك ايلمور چون علي دردانه سيدور
قارداشي شمع وفادور بودا پروانه سيدور
عالمه ايله نه بير شمع و نه پروانه گلور

گر ديساخ حوريدي يوخ حوريده بو پايه ي شور
عشق سرمشقني بوندان گرك آلسون هامي حور
گوروري قتلگهي چولقاليوب شعله ي نور
ظلمت غمدن اودور روضه ي رضوانه گلور

قلبي اودلار اورگي اولسا غريبين يارالي
دوزه بولمز گوره محبوب حبيبين يارالي
عشق بيماري او دم تاپدي طبيبين يارالي
نه طبيب حشره تك عالم اونا درمانه گلور

ايستدي قتلگهِ عشقه خانم سالسون اوزين
يارالي قارداشنا شرح ايلسون دلده سوزون
باغبانِ چمنِ عشق آچوب قانلو گوزين
نه گوروب بلبل غم غملي گلستانه گلور

سسلدي سالدون عجب وقتده مني ياده باجي
يالقوزام بولدون اودور گَلموسن امداده باجي
آشنا اول غمه گلمه بيله فرياده باجي
سيل گوزون ياشني، چوخ آغلاما بيگانه گلور

بير سوزوم واردي باجي عمده وصيّتدي سنه
سويگلي نازلي رقيَّم چون امانتدي سنه
جان سنون جان بالامون گرچه اذيّتدي سنه
آغلارام ناليه گورسم من او دردانه گلور

گوردي شه آز قالوري عمر گُلُستاني سولا
گل رضا اولمادي بلبل گوزي اشكيله دولا
خيميه بير دليله زينبي سالدي يولا
ايله قارداش باجي گور عالم امكانه گلور؟

ديمه قارداشدان او دمده باجي دويدي گيدوري
جسميدن مهر و وفا رختيني سويدي گيديري
قتلگه ايچره ولي روحيني قويدي گيديري
خيمه ده قارداشينا قورسون عزاخانه گلور

خيمه ده گورديله گون باتدي قرا يللر اسر
بير بيره سويلدي ميداندا قيامتدي مگر
گوز تكوبلر يولا حيران گوره لر وار نه خبر
گوردولر زينبين اللر بويانوب قانه گلور

يتدي خرگاهه خانم دوره سين آلدي بالالار
باغبان اولماسا واضحدي كه گُللر سارالار
ديه بولمور شه ئولوب، قلب لرين غم يارالار
بو محن ايله گران زينب نالانه گلور

يوز دوتوب حضرت كلثومه ديدي آغلا باجي
ويردي جان شاه زمن سينوي گل داغلا باجي
دستگير اولماقا محكم بيلوي باغلا باجي
ديمه بيرده باشوين محنتي پايانه گلور

قوردي بير بزم عزا زينب آي اولدوزلاريلن
ني كيمي داده گلوب ليلي اوغولسوزلاريلن
قول بويون اولدي رقيّه بالا قيزلاريلن
گور ايله بزم عزا بيرده بودورانه گلور؟

آغلاشوردي بالالار گوردوله بير سس اوجالوب
ازدحاميله گَلولَّه، گورن حيرتده قالوب
بير بيره سويلَديلر كيمدي بولار ياده سالوب
تسليت ويرماقا بو جمع پريشانه گلور

ديديلر يوخدي بيزيم بير كسيميز داده گَلَه
باغبان اولماسا، كيم همدم اولار غنچه گُله
فكر ايدوللر نه حكايتدي گلوب مطلب اله
گوردولر لشكر كين خيميه تالانه گلور

ديمورم عشقون او گون قافله سي دوشدي گجه
ليك بولمم نجه زينب گونوزي ايتدي گئجه
اويانان خيمه ده زهرا بالاسي ياتدي نجه؟
يانسون هانسي غمه، زينب غمي گور سانه گلور؟

يوخدور عبّاس، اوزي مخيَمده ويروردي گئجه پاس
گوردي بير آتلي گلور، ليك گيوب قاره لباس
ديدي دشمندي گلور غارته، يوخ بيزده لباس
گئجه وقتي حرمه كيمدي، نه عنوانه گلور؟

فكر ايدور كيمدي بو آتلي گوره سن ياللعجب
تا ياخونلاشدي گوروب اوز آتاسي شاهِ عرب
سسلنور قورخما قيزيم زينب اَيا كان ادب
مرتضي دور خيمه شام غريبانه گلور

اي سليمان وفا، اي شه اقليم محن
درگهوندن الي بوش ايلمه سن سائلي سن
الده بير پاي ملخ تحفه سي اي شاه زمن
مور تك «اعظمي» درگاه سليمانه گلور




بؤلوم : قتلگاه یازار : hasanfatemefard 0 باخیش

ايكي نوگل پيمبر سنه ميهماندي حارث

دوشنبه 12 اسفند 1392

+0 به يه ن
نام شاعر : اعظمي


ايكي نوگل پيمبر سنه ميهماندي حارث
آناميز وطنده گوزلور رحم ايله اماندي حارث
ايكي نوگل پيمبر سنه ميهماندي حارث
آناميز وطنده گوزلور رحم ايله اماندي حارث
دلده سوز آهيميز وار وورما نه گناهيميز وار
آتاميز اُلوب يتيموخ حاليميز عياندي حارث

كافر اولسا ميهمانه اوز ايوينده حرمت ايلر
هر شقي اولا غريبين حاليني رعايت ايلر
مسلم اوغلونا مسلمان شرعيده حمايت ايلر
گورموسن چو آب نيسان اشكيميز رواندي حارث

نه سببدن اُلدورورسن ايكّي طفل بي گناهي
غافل اولموسان خدادن تيز دوتار يتيمون آهي
آلار انتقام سندن اوزي منتقم الهي
بيز بينوايه خونخواه حيّ لامكاندي حارث

گيچ بيزيم بو قتليميزدن سني جدّيميز پيمبر
غول كيمي بيزي آپار سات راضيوخ ايا ستمگر
سنكه بولمدون بوله لّر دُرّ قدريني بولنلر
دُرّي كه اونون بهاسي ايكي نقد جاندي حارث

بيزي اُلدورورسن اُلدور الده نه علاجيميز وار
ليك آتاسيزوخ غريبوخ رحمه احتياجيميز وار
گوز تيكوب يولا وطنده بيرجه خوردا باجيميز وار
اونا رحم ايله چو لاله باغري لخته قاندي حارث

چرخ كينه جو بير ايلدي بيزي ايلميشدي محبوس
ديدوخ اي صبا گيدوب دي آنا ايتمه آه و افسوس
حبسيدن خلاص اولوب بيز گينه گلّوخ اولما مايوس
صبر خانه سي او زار و غمكشين تالاندي حارث

يوخودا بابام ديردي نيه قلبيوي سخارسان
ايتمه غم اولار كه حبس خانه دن چخارسان
بولمديم آنام ايوين سن جور و ظلميله يخارسان
يوز او حبس خانه دن بو ستمون ياماندي حارث

هر دقيقه بزم شورا قتليميزدن اوتري قورما
قورخوروخ اماندي ظالم يانيميزدا باري دورما
ايمديكه قتيل ايدورسن باخ خدايه سيلي وورما
چرخ اطلسه فغان و آهيميز داياندي حارث

ايلمزله رحم يوخسا سخيلاندا قوش بوداقه
هانسي ميزبان جهاندا بيله ظلم ايدوب قوناقه
باري وير بيزه اجازه بير قوياخ دوداق دوداقه
داخي يوخدي فرصت آخِر موسم خزاندي حارث

ايمديكه سن اُلدورورسن گل مني ازلده اُلدور
قارداشيم اوشاقدي قورخار مسلمه بو غنچه گلدور
اُلدوروب ايكي يتيمي ظلميوي جهانه بولدور
گرچه ظلمون ازّليندن عالمه عياندي حارث

گوردولر يتوب شهادت وقتي آلديلار اجازه
ايكي قطب قطب عالم دوردولار اودم نمازه
گوزي ياشلي يوز دوتوبلار سمت قبله گاه رازه
ديديلر خدا گورورسن نجه ديني داندي حارث

اُلدورور بيزي بو ظالم منتقم اوزون گواه اول
بولوسن كه بي پناهوخ باري سن بيزه پناه اول
بوندان آل بو انتقامي بير يتيمه دادخواه اول
نه هرايه كيمسه يتدي نه اوزي اوساندي حارث

گور نجه بو بي مروّت سني ايلدي فراموش
مسلمين چراغين ايستور ايلسون ستمله خاموش
الده ساخليوب شهادت جاميني گرك ايداخ نوش
نه اوتاندي جدّيميزدن نه بو حاله ياندي حارث

گوردولر اجل يتيشدي بير دويونجا آغلاشوبلار
اُلدوروب آتوب فراته بير قدر اوزاقلاشوبلار
سودا قول بويون اولابلار ايكيسي قوجاقلاشوبلار
ديمه بير زمان او غفلت خوابيدن اوياندي حارث

«اعظمي» مجسّم ايله بو اسفلي حالي گوزده
قطره قطره اشك آلون دوزوله سياه يوزده
بيرده مطلعي كرار ايت چونكه واردي جان بو سوزده
ايكي نوگل پيمبر سنه ميهماندي حارث





بؤلوم : طفلان مسلم یازار : hasanfatemefard 0 باخیش

شاميدن گتديم حسين قانه باتان پيرهنون

دوشنبه 12 اسفند 1392

+0 به يه ن
نام شاعر : نخستين

شاميدن گتديم حسين قانه باتان پيرهنون
بوريادور آنام اوغلي ، عوض ايله كفنون

اوتانورسان منه ئوز درديوي قارداش ديه سن
بيلورم يوخدي الون جامه عشقي گيه سن
زينبون قويماز آنام اوغلي سني اينجيه سن

سينون اوستن گوتوروب اصغري دينديرّم حسين
سنه پيراهني آهسته گيندرّم حسين

ساربان قطع ايلين اللرووه   ويرمارام ال
خنجر شمر كسن حنجرووه   ويرمارام ال
قطعه قطعه داغيلان پيكرووه   ويرمارام ال

باغلارام ياره وي باشيمده اولان معجريلن
قارداش آسوده ياتارسان صودامر اصغريلن

واردي بو پيرهنون دورت مينه دين ياره يري
هانسي گوگده گورونور بير بئله سيّاره يري
قالميوب زينب مظلومه ده بير چاره يري

بو همان پيرهنيدور سنه زهرا توخيوب
توخياندان قوتارينجان نچه قرآن اوخيوب

وار يري زينب عليايه حسين بيله ديه
صاف يري يوخدي حسين پيرهن عشقي گيه
يثربه گئتسون آپار وئر سن آنام فاطميه

بيلورم كه سوروشار سندن او غمديده مني
سوله گوندردي حسينون سنه بو پيرهني

آنام اول پيرهني گوستره جك ياره باجي
باوفا يار ئوزي واقفدي بو اسراره باجي
گوزل اسباب شفاعتدي گنهكاره باجي

الده بو پيرهنيم محشره زهرا گله جك
پا برهنه باش آچوق حضرت طاها گله جك

قبريمون اوسته باجي آغلاما يانديرما مني
تازه دن رنج و غم و درده بويانديرما مني
يولما آغ زولفوي صبر ايله اوتانديرما مني

آغلاما قافله عشقووي حمل ايت وطنه
يولووي گوزلينون چوخدي باجي گئت وطنه

مشكي آت  نهره باجي زينب آپارما وطنه
صاحب مشكون ئولوب مشك نه لازمدي سنه
باجي ئوز درودوي كشف ائتمه او قولسوز بدنه

قبري اوسته آپاروب مشكي آچوب سرمه باجي
منه خاطر اونا سو مشگيني گوسترمه باجي

قارداشيم نهر فرات اوسته لب عطشان يخيلوب
صحبت سو ايلمه قلبي دولي قان يخيلوب
دوغرانوب گول بدني حالي پريشان يخيلوب

خشك اولوب قاني  ياتوب ، ياخشيدي پيكان ياراسي
يوخودان دورسا نفس ويرسه وئرر قان ياراسي

چشمه تك نهر فرات اوسته وئروب قان ياراسي
درد قرآنه ايدوب قانيله درمان ياراسي
سانا گلمزدي وجودينده وئره سان ياراسي

ياره لي شيريمي نهر اوسته اوتانديرما باجي
قان وئرر ياره لري قانه بويانديرما باجي




بؤلوم : اربعين یازار : hasanfatemefard 0 باخیش

يوزين قويدي دوباره اول مزار اطهره زينب

دوشنبه 12 اسفند 1392

+0 به يه ن
نام شاعر : يوسف معزي

يوزين قويدي دوباره اول مزار اطهره زينب
يتوردي مطلبي بير بير او شاه محشره زينب
قسم ويردي حسيني آلتي ايليق اصغره زينب

ديدي اي مظهر طاها مني گل سرفراز ايله
قوزي قربانوين قبري هاياندا زينبه سويله

آنام اوغلي گزوب هر كيم تاپوب ئوز يارينين فبرين
باسوبدور جان تك آغوشه هامي دلدارينين قبرين
گزور بير غملي مادر تاپمور ئوز غمخوارينين  قبرين

اوركده اللري قلبنده درد و محنتي واردي
ملر آهو كيمين قلبين حسين جان تير غم ياردي

تاپلانمور اوغلونون قبرين نشان وير اول دل افكاره
اماندي قويما چوخ گزسين بو ماواده او بيچاره
علي و اصغره تحفه گتورموش خيردا گهواره

گجه گوندوز اوني هي ترپدوب لايلاي چالوب آغلار
يانقلي آهيله گردون دونه اود سالوب آغلار

بو قدري آغلادي زينب سوزوب اشكي عذاريندن
حسيني باخبر ايتدي خانم حال نزاريندن
بيله بولّم بو سس گلدي او شش گوشه مزاريندن

ديدي سويله ربابه چوخ دولانما اصغرين قبرين
سينم اوسته ياتوب آختارما بو خونين يرين قبرين

دينن اي غم زده مادر بو قدري ايلمه شيون
ايشيتسه نالوي حتما بو يرده شاد اولار دشمن
علي و اصغره ايتديم يارالي سينمي مدفن

نه گهواره ، نده زينب سووين مشتاقيدور اصغر
قيام حشره جك سويله سينمده باقيدور اصغر





بؤلوم : اربعين یازار : hasanfatemefard 0 باخیش

گوردوم جدا باشيندا علي اكبرين يوزين

دوشنبه 12 اسفند 1392

+0 به يه ن
نام شاعر : يوسف معزي

گوردوم جدا باشيندا علي اكبرين يوزين
چوخ مايلم سينونده گورم اصغرين يوزين

اي باصفا ديارووه يورقون قئيتميشم
اولسون قسم وقارووه يورقون قئيتميشم

شكر ايلورم يتيشدي اليم اربعينووه
يوز قويماقا مزارووه يورقون قئيتميشم

باخ گور نجه انوب قولوما تازيانه لر
ردّي قالور جوارووه يورقون قئيتميشم

باخديم كنار نهر فراته بو گون دئديم
عباس نامدارووه يورقون قئيتميشم

تاپشيرديقون مودبه قيزدان خجالتم
صحراي مشكباروه يورقون قئيتميشم

قان آغلاديم ئولنده حضورنده يا حسين
مظلومه ياد گارووه يورقون قئيتميشم





بؤلوم : اربعين یازار : hasanfatemefard 0 باخیش

1 | 2 | 3 | 4 | 5 | 6 | .. | 9 |

 

بلاگا گؤره


    سلام
    بو وبلاكين سعي وار
    بهترين تركي نوحه شعري لري نين سيچيلميشين
    سيزين حضوروزه تقديم ايليه
    ياعلي


سایغاج


ایمکان لار


    اسما خداوند متعال

    log

    کد لوگوی سه گوش گوشه نما