گلچين حسيني
زينبم اودلارا يانديم گلديم
+0 به يه ن
نام شاعر : عدل جوي تبريزي
زينبم اودلارا يانديم گلديم
كوفه وشامي دولانديم گلديم
دولانوب عطروي آلديم گلديم
زينبون عطروه قربان يارالي
بو گوزل قبريوه قربان يارالي
نجه كي عهديمه پيمان الديم
حقووي عالمه اعلان الديم
ظلم ايوين شامده ويران الديم
ثابت ايتديم كه جهالت ده ديلر
ئوزلري بولدي ذلالت ده ديلر
شهدا خط سعادت ده ديلر
بس كه گلدور شهدانون هره سي
ايله بير سير گلستان هوه سي
قبروون وار نه گوزل منظره سي
گلشنونده يره گللر دوشنوب
باجون اولسون نيه شش پر دوشنوب
اياقون آلتنا اكبر دوشنوب
دود و آهيم اسفيم عرشه چاتوب
باشيمي بو سوزوون فكري قاتوب
ده گوروم صودامرون هاردا ياتوب
ديمم اي گل ثمروندن ده منه
ديمورم بال و پروندن ده منه
يارالي ياره لروندن ده منه
گوروروم آتش عشقه يانوسان
من كيمي درد اودونا اودلانوسان
گوزون آچ زينبووي گور تانوسان
ديموسن سلسله غم هاني بس
بلبل گشن طاها هاني بس
ديموسن نازلي رقيه هاني بس
او گجه گوز ياشون احسان ويردي
گوزوم اشكين يرينه قان ويردي
اليم اوستونده بالم جان ويردي
جان ويرنده منه بير باخدي بالام
قلبيمه آتش غم ياخدي بالام
ايله بيل ئولدوزودي آخدي بالام
ديدديم اي نو گل گلزار كرام
ندي دردون منه ده نازلي بالام
ديدي آهسته منه عمه آجام
رخت عيشي او زمان سويدوم حسين
ديريليقدان داخي من دويدوم حسين
يوزومي گل يوزينه قويدوم حسين
خط سيريمده ديمه آخديم حسين
او شيرين ديل بالاني آتديم حسين
بالامين قبرين اوزوم قازديم حسين
قبري قازدوقجا اونا واي ديمشم
اشك چشميم آخوب اي واي ديمشم
بالاما قبريده لايلاي ديمشم
بؤلوم : اربعين یازار : hasanfatemefard 0 باخیش
ايله شش گوشه مزارون يره زيبا دوشنوب
+0 به يه ن
نام شاعر : حافظي تبريزي
ايله شش گوشه مزارون يره زيبا دوشنوب
آنام اوغــــلي ديه سن عرش معلا دوشنوب
ايله قبرون بو بيابانه ويروب ذوع وصفــــا
روضـــــه جنت اعلايه دونــــوب دشت بلا
شوريدي،جاذبه دي ،عشقيدي باشدان اياقا
هانسي طراح ويروب طرح بو ماوا دوشنوب
يرده ترسيم اولونوب عالم بالا نقشـــــــي
گــــورميوب ديده دنيــــا بو دل آرا نقشي
نجه كه منعكس ايلر گچه دريـــــا نقشــي
فرش تك فرشه ايله گنبد مينــــا دوشنوب
لحظه لحظه يتشندن بورا فكريم دوزه لور
يا گـــلور تير تخيـــل توخونور قلبــي دلور
اوزيني گورمور اما آنامون عطري گلـــور
ديه سن قرخــا گلوب قبريوه زهرا دوشنوب
بؤلوم : اربعين یازار : hasanfatemefard 0 باخیش
زينبون قارداش گلوبدي خاك پايون بوس ايده
+0 به يه ن
نام شاعر : لاادري
زينبون قارداش گلوبدي خاك پايون بوس ايده
باغ وصلون صحنه سينده جلوه طاووس ايده
گلميوب چوللرده سرگردان قالان افسوس ايده
منده دل يوخدور ديئم ، شيرين دليم منلن دانيش
سن اوزون آخر ديلون قرباني بير ديللن دانيش
من ديديم اوز درديمي نوبت سنوندور سن دانيش
آغلاديم ياندوقجا قلبيم دوتدي قان ياش عالمي
يانديرار سو اولماسا اما شررپاش عالمي
آيري عالمدور ديللر باجي قارداش عالمي
هاردا قالدي بس او عالم سيد و سرور منه
وار يادوندا بير گوني يثربده اي شاه جهان
گون قباقينده مني دوتموشدي بير خواب گران
گون اذيت ايتمسون قيلدون عباني سايه بان
عهد قيلميشدوم ايوم اول لطفوي پاداش حسين
گون او گوندي اي سليل پادشاه قل كفي
زينب غمديده ايتسون عهد ديرينه وفا
بير زاديم قالمور ولي ايله سويوب اهل جفا
اولمشام منده سويولماقدا سنه يولداش حسين
بؤلوم : اربعين یازار : hasanfatemefard 0 باخیش
كرب و بلايه چون يتوب غم كارواني زينبون
+0 به يه ن
نام شاعر : خادم عطار تبريزي
كرب و بلايه چون يتوب غم كارواني زينبون
عرش برينه اوج ايدوب اه و فغاني زينبون
قبراوسته اچدي باشيني جاري ايدوب گوز ياشيني
اوخشوب سوسوز قارداشيني ارتدي فغاني زينبون
يا من ذبيحا من قفا يا من قتيل الاشقيا
گلدي باجون دور يا اخا اول همزباني زينبون
ايله نظر عذاريمه بو ديده اي خون باريمه
گوزدن اخار رخساريمه اشگ رواني زينبون
شامه كيمي شمر دغا چوخ ايليوب جور و جفا
تشريح ايده دلده اخا يوخدور تواني زينبون
اولدوخ اسير قوم كين نه ياور ونه بير معين
شمر اولدي قارداش شامجن چون سارباني زينبون
قويموب بيزي اول كوفيان تا ايلياخ اه و فغان
ايمدي گررك اولسون عيان سر نهاني زينبون
يوخدور وفا اياميده اول قوم خون اشاميده
قالدي روقين شاميده ارام جاني زينبون
دفن ايلديم با صد محن اوز كوينيون قيلديم كفن
قاداش پوزولدي ظلميلن بل گلستاني زينبون
اولدي خرابه منزيله نه سايبان نه حايلي
عرض ايتمگه يوخدور دلي بو ماجراني زينبون
يارب به حق لافتي بو جمعه سن ايله عطا
زوار اولا اول قبره تا بو<<نوحه خواني >>زينبون
بؤلوم : اربعين یازار : hasanfatemefard 0 باخیش
اي دشت كربلا سنه اهل بلا گلور
+0 به يه ن
نام شاعر : لاادري
اي دشت كربلا سنه اهل بلا گلور
بير دسته دردمند آلا سندن شفا گلور
آزاد اولوبدي ظلميدن آزادگان عشق
ديدار ياره يار اورگينده يارا گلور
قولاردا يوخ طناب آچيليب بال و پرلري
اما اوركلري دوتولوب برملا گلور
گيدموش گيدنده ظلميله بو غملي كاروان
فكر ايتمه ايندي غمدن اولوبدور رها گلور
محملر اوسته دائر ايدوبلر حسينيه
زينب او هيئت ايچره ديور اوخشاما گلور
چون آيريلاندا قارداشينا آغليانميوب
ايندي دويونجا قارداشينا آغليا گلور
قيزلار قوشوب سيزيلدسيني ناقه زنگينه
اما رباب آغلاموري بي صدا گلور
بوشدي رقيه نون يري بو كاروانيده
دردي ايدوب ربابي غمه مبتلا گلور
يتميش ايكي شهيده دوتا اربعين بو گون
زوار اولوب عيال شه لافتي گلور
زينب گوز آلتي قيزلاري بير بير سايور گورور
ايگرمي ايكي يتيميدن اون بير بالا گلور
ليلا دلينده ورد ايليوب اكبرين آدين
هر سوز باشي ديور آنان اولسون بالا گلور
دور بير سولان جماله باخ اي مه جمال اوغول
رنگيم ايله سولوب نظره كهربا گلور
باشين داليجا كوه و بيابان دولانموشام
عشقين ايدوبدي ليليني مجنون نما گلور
چيخ پيشوازه دوت اليمي ناقه دن انوم
گورسونله ليلينون الين اكبر دوتا گلور
قوي داغلي سينم اوستونه قانه باتان باشي
اشكيله ليلي ياروه مرهم قويا گلور
بير ايري محمل اوسته چيخور گويلره فغان
كيمدور بو آغليان سسي چوخ آشنا گلور
بؤلوم : اربعين یازار : hasanfatemefard 0 باخیش
داغدار ائتدي حسين(ع)! پوزغون مزارون زينبي
+0 به يه ن
نام شاعر : ابواالفضل عظيمي بيلوردي
داغدار ائتدي حسين(ع)! پوزغون مزارون زينبي
آتش عشقه ساليب ، صبر و قرارون زينبي
غم قوجالديبدير مني ائيليبدي گيريان قارداشيم!
گؤز ياشيملا بير آخير گؤزلرده كي قان قارداشيم!
چوخ مصيبتله يئتيشديم قبريوه، جان قارداشيم!
ائيله دي نيسگيل داغي محزون غبارون زينبي
سؤيله ييم آخير سنه من هانسي بير فرجامدن؟!
كوفه دن يا دير راهيب دن يا راه شام دن؟!
گل دئييم بير قورخولي ويرانه قالميش دام دن
گؤر نئجه سوزان ائديبدير طفل زارون زينبي!
باغريما اود سالدي هيجران،قانه دولدي شامده
غصّه دن بير نوگولون آج ياتدي سولدي شامده
هئچ سوروشمورسان رقيّه ن پس نه اولدي شامده
جان وئريب يانديردي نازلي يادگارون زينبي
محبس اولدي روحيمه او مُلك شامي قارداشيم!
شرمسارم كي دييه م من چوخ كلامي قارداشيم!
اكتفا ائت بو سؤزه آل بو سلامي قارداشيم
يانديريب ياخدي خلاصه روزگارون زينبي
قالمادبق ساكت ولي پوزغونلو بير آمالده
عرصه ني دار ائيله ديك ظولمه خروشان حالده
فرصتي دشمن دن آلديق، وقت قيل و قالده
صبره تسليم اولدو چون دوتدي وقارون زينبي
ائيله ديك رسوا يزيدي شامده سجّاد ايله (ع)
ناگران اولما كي جنگيم وار گئنه بيداد ايله
هاشمي بولبوللري قويمام گزه صيّاد ايله
عارف فاضل ائديب عطر بهارون زينبي
خطبه ميز يارميشدي دشمن باغريني شمشير تك
گؤز ياشي آنجاق سلاح اولموشدو كسكين تير تك
روبهان كوفه و شامي ووروردوق شير تك
ائيله دي سؤزلر دَنيزي اقتدارون زينبي
باخما معناده بئله نيسگيللي محزون هيئته
دولموشام آللهه آند اولسون سراسر حيرته
يئنديريب جانون تكان وئر قلب شاه امته
گؤرنه حاله سالدي قانلي لاله زارون زينبي!
اولموشام افسرده هيجرانيندان اي درياي داد
گل دعا ائيله بو تئزليكله آچيم وصله قاناد
قالماييم دونياده گؤرموم بير بئله جور و فساد
ائيله دي مفتون او راز آشكارون زينبي
دونيانين باغرين گرك بو كربلاده داغلييام
نيسگيلين چوخدور يئري وار هرنه قدري آغلييام
قالمادي فرصت منه قارداش! ياراوي باغلييام
غرق ماتم ائتدي حزن بيشمارون زينبي
قوي غريبليكلرده يانسين قوربانون اولسون باجون
چيرپينان قلبي دايانسين قوربانون اولسون باجون
باشيوه پيدر دولانسون قوربانون اولسون باجون
اودلادي دونياده چشم اشكبارون زينبي
روحيوي قايتارماغا بير يول چاليش منله حسين! (ع)
آيريليقلار آتشينده دور آليش منله حسين!
دلشكسته قالميشام گل بير دانيش منله حسين!
الامان ائيليبدي حال انتظارون زينبي
اَللري قوينوندا باخ گؤر نه نوا ائيلير رباب!
سينه داغين غملي حالدا برملا ائيلير رباب
ايسته يير دردين دئسين اما حيا ائيلير رباب
اودلادي بو همسر بي اختيارين زينبي
ناز بالاسين وئر آنا بير آرزييا چاتسين حسين!(ع)
باغرينا باسديقجا بير بير غملرين آتسين حسين!
اصغرين راحتدي راحتتر ولي ياتسين حسين!
يانديريب ياخدي عجب ديلسيز هزارون زينبي
من دئييم يالقيز بالاندا ، سنده اكبردن (ع) بويور!
من دئييم نازلي رقيّه ندن، سن اصغردن بويور
من دئييم ياسدان ، سن عباس دلاوردن بويور!
قارداشيم! چوخ يانديريبدي روزگارون زينبي!
اؤلمه ييبسن آمما سن اي عارف عالي مرام
حق يولوندا اؤلمز هئچ بير شخص مخصوصاً امام
بو آخان گؤز ياشي اولموش آيريليقدان، وَالسلام
عزّته ماليك ائديب پروردگارون زينبي
بؤلوم : اربعين یازار : hasanfatemefard 0 باخیش
غبار غم بورويوب كربلاني قرخ گوندي
+0 به يه ن
نام شاعر : بشيري
غبار غم بورويوب كربلاني قرخ گوندي
ني يون نواسي دوتوب نينواني قرخ گوندي
ولايتين چمنينده اياقلانوب گوللر
شهيد ائدوبله سوسوز باغباني قرخ گوندي
چمندن آيري دوشوب بلبلان دلخسته
گورَنميوبله گوزل گولستاني قرخ گوندي
نه باغبانه ترحم ائدوبله نه گولونه
آتادان آيري سالوبلار بالاني قرخ گوندي
ديار كرب وبلاده بير اتفاق دوشوب
دوشوبدي ديلره غم داستاني قرخ گوندي
آخوبدي خون خدانين قاني يره ناحق
قان آغلادور بو محن آسماني قرخ گوندي
ديَنورم ديه بيلمم نه ظلم ائدوبدي يزيد
ملول ائدوب ستمي ماسواني قرخ گوندي
اولوبدي غارت حسينون او كهنه پيرهني
ائدوبله جامه سيه انس و جاني قرخ گوندي
ستمله قول قولا باغلاندي اهل بيت نبي
دوشوبدي چوللره غم كارواني قرخ گوندي
آتام آنام اولا قربان او زينبه كه اولوب
حسين بالا لارينون پاسباني قرخ گوندي
هرعاشق آيري دوشه ياريدن ياتا بيلمز
رباب ياتمادي گويا بير اني قرخ گوندي
ايچبدي سو صوديلن دوشلري دولوبدي ولي
گزور تاپانموري ديلسيز بالاني قرخ گوندي
بوقرخ گونون غمي يازماقيلن باشا گلمز
غم عا جز ايليوب هر بير بياني قرخ گوندي
بشيري قوما قاپوندان ايا امام حسين
چيخاتميوب هله ثوب قراني قرخ گوندي
بؤلوم : اربعين یازار : hasanfatemefard 0 باخیش
عجب زينبه اولدي سعادت آنام اوغلي
+0 به يه ن
نام شاعر : تائب تبريزي
عجب زينبه اولدي سعادت آنام اوغلي
گلوب ايلدي قبرون زيارت آنام اوغلي
ديرديم اولا مهلت اجلدن بو فكاره
نصيبيم اولا بيرده سالام يول بو دياره
گتوب بيردوشنم من بو ششگوشه مزاره
او منظور اله گلدي بو ساعت آنام اوغلي
بو اودلي دلي قارداش عجب كامه يتوردوم
بو ششگوشه مزاه گلوب توشه گتوردوم
بو پيراهنون الده بو قبراسته گتوردوم
ايدم تا سنه رد امانت آنام اوغلي
بو كوينك منه سندن قالوب بيرجه نشانه
اولار ايتماقا ناله بير عمر الده بهانه
باسوب باغريما گلم نوايه يانا يانه
منه نالدن اولماز فراقت آنام اوغلي
چوپروانه وجودي وفا شمعنه چالام
بو كوينكدن اولونجه گوزل عطروي الام
الوب عطروي سانسيز ياران ياديمه سالام
گلر درده دل پر جراحت آنام اوغلي
اگر اولسا نصيبيم انام مدفني قارداش
اخار ايسلادير اشگ تريم دامني قارداش
انام قبرينه سالام بو پيراهني قارداش
او مظلوميه قيلام شكايت آنام اوغلي
بؤلوم : اربعين یازار : hasanfatemefard 0 باخیش
هيچ كيم منيم تك اتش هجرانه يانمادي
+0 به يه ن
نام شاعر : تائب تبريزي ذهني زاده
هيچ كيم منيم تك اتش هجرانه يانمادي
پروانه ده بو نوعيله اوتدا دايانمادي
مجنون اگر چه كوه و بياباني گزدي چوخ
صحراي عشقي ليك بوقدري دولانمادي
چوخلار جهاندا غالب و مغلوب اولوب ولي
هيچ پادشهون اهل وعيالي تالانمادي
چوخ نيسگيل اولدي زينبيوه اي عزيز جان
سن جان ويرن زمان گوزيوي باغلياماديم
شام اهلي شاميده ديديلر خارجي بيزه
ال پيمبروخ ديدوخ هيچ كس اينانمادي
خوب بقايه گيتدي روقيه خرابه ده
هر نه فغان و ناليه گلدوخ اويانمادي
بير نصف شب خرابه اي شام خرابيده
توپراق لار اوسته ايستدي ياتسين ياتانمادي
بؤلوم : اربعين یازار : hasanfatemefard 0 باخیش
قارداش باجيليق رسمي اولارميش بله ؟ قارداش
+0 به يه ن
نام شاعر :عيني زنجاني
هيچ فكر ايلموردوم بو يره بيرده گلم من
ويرانه ده يوللاردا ديدوم بلكه ئولم من
قارداش باجيليق رسمي اولارميش بله ؟ قارداش
قارداش ئولومي ضربه ويرارميش بله قارداش
قديم بوكولوب باش آغاروب فكر ايلمزديم
زينب بو بيابانه دوباره گله قارداش
قرخا ياخون اطفالون حسين قرخا گلوبدي
قورخوم بودي قرخيندا ربابون ئوله قارداش
اي كوينگي اللرده قالان ؛ دور سنه قربان
گلدي بو چوله شامه گيدن قافله قارداش
آغ ساچلاريمي قبريوون اوسته سررم تا
قبين داشيني ساچلاريم الآن سيله قارداش
نامحرم حسين يوخ باش آچوخ آغلارام ايندي
گلدي باجون هم آغليا ؛ هم دينجله يارالي
گلديم سو سپم گوز ياشيلان قبريوون اوسته
شرمنده ايدم آب فراتي بله قارداش
گچدي ئورگيم ؛ گچدي باشون نوك جدايه
دوشدوم باشيوون آرديجا چولدن چوله قارداش
وار علتي يارديم باشيمي كوفه ده نيلوم
گوردوم بلشوب نيزه ده باشون كوله قارداش
چوخدور يارام ؛ آننيم ياراسين فاش ايلديم من
قالسون يارالار كوينگون آلتدا هله قارداش
غساله منه غسل ويرنده بيله جكدور
هانسي يارالار زينبي گتدي ديله قارداش
ويرانه بير بلبل حسين ئولدي قفسده
ئولدوردوله گون ويرمديلر بلبله قارداش
ويرانه ده ئولدي بالوون قبني قازديم
نه هفته دوتا بيلوم اونا نه چله قارداش
بؤلوم : اربعين یازار : hasanfatemefard 0 باخیش
