گلچين حسيني
ورود به كربلا-اثر صراف
+0 به يه ن
ورود به كربلا
نام شاعر : مرحوم حاج رضا صراف تبريزي( صراف )
هله گۆلشَنين گـۆلــۆ سـوْلمئـيــوب
آنــام آغـــلامـــا، بــاجێـــم آغـــلامــا
هله ساغـدێ قارداشـۇن اؤلمئيـوب
آنــام آغـــلامـــا، بــاجێـــم آغـــلامــا
آنامێن عزيزه قێزێ باجێم
هله اوْلما مايل-ي-درد-وْ-غم
قوْشۇنۇم دۇرار هامێ بير به بير
هله ياتمئيوبدي اسير عَلَم
هله صاحب-ي-عَلَم اؤلمئيوب
هله ائتمئيوبله قوْلۇن قلم
هله مشكي قانيله دوْلمئيوب
آنام آغلاما، باجێم آغلاما
هله قۇملار اۆستۆنه دۆشمئيوب
باجێ اكبرين قد-ي-نورسي
گۆن ائوينده* ظۆلميله قالمئيوب
هله پاره-پاره جنازه‌سي
هله خئيمه‌لرده‌ن اۇجالمئيوب
گؤيه لئيلي‌نين بالا واي سسي
هله مشكي قانيله دوْلمئيوب
آنام آغلاما، باجێم آغلاما
هله پوْزمئيوبله تيفاغيمي
هله رونقي وار اساسيمين
هله قوْيما ايندي عم اوْغلۇ واي
دييه نو عروسيني قاسمين
هله ياسه باتما چوْخ آغلاما
هله ابتداسيدي ياسيمين
هله مشكي قانيله دوْلمئيوب
آنام آغلاما، باجێم آغلاما
هله اؤلمئيوب ايكي نورسين
جيگرين باشێ هله يانمئيوب
هله زۆلف-ي-كاكُل اكبريم
باجێ آلقانينه بوْيانمئيوب
هله آغلاماز علي اصغريم
هله ظۆلم اوْخيله‌ن اوْيانمئيوب
هله مشكي قانيله دوْلمئيوب
آنام آغلاما، باجێم آغلاما
هله آغلاما قالێر آغلاماق-
ليقيوين زمانه ده چوْخ يئري
باجێ زينب آغلاما ساكت اوْل
دئمه ساكت اوْلماغا يوْخ يئري
هله يوْخ باشێمدا قێلێج يئري
بدنيمده يوْخ هله اوْخ يئري
هله مشكي قانيله دوْلمئيوب
آنام آغلاما، باجێم آغلاما
بۇ دياريده اي آنام باجێ
هله ظۆلم لجّه‌سي داشمئيوب
هله لئشگر-ي-ستم-وْ-جفا
سيزه جور-وْ-ظۆلم الين آشمئيوب
هله خئيمه‌گاهيم آليشمئيوب
هله عترتيم چؤله قاشمئيوب
هله مشكي قانيله دوْلمئيوب
آنام آغلاما، باجێم آغلاما
هله شيشه-ي-دل-ي-صافيوي
باجێ غم كدورتي باسمئيوب
هله دين اساسي پوْزۇلمئيوب
هله صر-صر-ي-ستم اسمئيوب
هله ظۆلم عرشه دايانمئيوب
هله شئمر باشيمي كسمئيوب
هله مشكي قانيله دوْلمئيوب
آنام آغلاما، باجێم آغلاما
هله قلبين اي باجێ يانمئيوب
يانار اوْدلار اۆزره كباب تك
بۇ قده‌ر سێزێلداما آغلاما
هله چكمه ناله رباب تك
باجێ قانيمي باجێلار يۆزه
هله ياخمئيوبدي خضاب تك
هله مشكي قانيله دوْلمئيوب
آنام آغلاما، باجێم آغلاما
هله هست عئشقيله هست سن
هامێ‌دان علاقه‌ني كس رضا
هله كي حسين پرست‌سن
بۇ سؤزيله وئر اوْنا سس رضا
هله سوز-ي-درديله مست سن
نه‌دي بۇ هوا-وْ-هوس رضا
هله مشكي قانيله دوْلمئيوب
آنام آغلاما، باجێم آغلاما
بؤلوم : ورود به كربلا یازار : hasanfatemefard 0 باخیش
