گلچين حسيني
گلوبدي بيرگون علي گوردي رو به قبله ياتوب
+0 به يه ن
نام شاعر : مرحوم حاج حيدر شبگرد(خوندل)
گلوبدي بيرگون علي گوردي رو به قبله ياتوب
كسوب علاقه بدندن قواي جسماني
گورنده بي حركت همسرين او سرور دين
نه حاله قالدي بولر اهل دل او معناني
بو نيّتيله او خاموشي بير دانيشديرسون
گلوب تكلّمه بو سوزلر اولدي عنواني
خطاب ايدوب كه دور اي قائد الصّلاه قيزي
رعايت ايت بو عليّ غريب و تنهاني
ديدي دوباره دور اي حامل زكات قيزي
گوزون فداسي گوز آچ ايتمه نقض پيماني
اوچومجي دفعه بويوردي عم اوغلوام زهرا
قسم علاقوه رد ايتمه بو تمناني
ندا نداي علي فاطمه جواب ويرن
منم كه مشكله سالام بو امر آساني
بو سوزده گوزلرين آچدي بتول نازيله
تبسميله ايدوب شاد او غملي مولاني
ديدي عم اوغلي بيله آغلاما سنه قربان
گوزموده گوندوزومي ايتمه ليل ظلماني
حيات و مرگي كناريمده روبه رو گورورم
گل اي كرامتي عاجز قويان مسيحاني
بهشتيدن مني دنيايه ايلدون معطوف
زيارتوندن اولار بو نقصه جبراني
هزار روضه ي رضوان فداسي بير نگهون
گورر دل اهلي جمالوندا بسط عرفاني
سن اولماسان نه بهشت و نه كوثر و نه قصور
تاپار سنيله صفا خلد حور غلماني
جلال بارقه ي ذوالجلالي سنده گورر
ويرر كليمه تجلاي طور سيناني
سنه مطيع اوامردي قابض الارواح
اطاعت امريوه ايلر او پيك رحماني
گلوبدي منتقل ايتسون مني بو عالمدن
بقايه چونكه بو عالمدي عالم فاني
ولي فراقيم اگر سخت مشكل اولسا سنه
حضوريون منه وار مين بهشت رجحاني
سن اولماسان منه سن سيز بهشت اولار زندان
بتول نيلوري سن سيز بهشت رضواني
عم اوغلي امر سنون دور نه اولسا منظورون
اواليمون سنه وار بير خضوع شاياني
اگر بو مرحله ده خواهشون حياتيم دي
بتول جانيله اجرا ايدر او فرماني
عم اوغلي من سني ترك ايتماقيم دگل آسان
بو آيريليق دگي بير روح ترك ايدر جاني
حسينيله حسنون زينبيله كلثومون
من اولماسام اولارين كيم اولار نگهباني
بو قدر آغلاما آغلار گوزون فداسي اولوم
ايدر گوزون ياشي شرمنده بحر عمّاني
حيات چشمه سي جاريدي هر دمونده ولي
يازوب فنايه قلم كل من عليهاني
اجازه ويرسن اگر چوخ يورولموشام منده
گيدوب بهشتده اولّام رسول مهماني
بويوردي فاطمه بير اود آليشديروب دلده
فراق سوزي آشوب حدّ و مرز طغياني
فقط بو گوز ياشي هر دم ايدر اوني خاموش
بولر فراقه گرفتار اولان بو ايماني
چتيندي داغ جوان ليك سخت تر بولورم
خدايه آند اولا من فرقت احبّاني
بو آيريليق ايله بير اودّدي حشره تك سونمز
يانار يانار كول ايلر يانديرار تن و جاني
غميم هميشه ليق اولدي سنون فراقوندا
سزادي اشكيم ايده شرمسار دريان
اولار بو سرّ گجه ياتميانلارا روشن
نيه منه گيجه لر اولدي ليل ظلماني
بؤلوم : حضرت زهرا(س) یازار : hasanfatemefard 0 باخیش
وا حسرتا آيردي اجل ياري ياريدن
+0 به يه ن
نام شاعر : مرحوم حيدر شبگرد(خوندل)
وا حسرتا آيردي اجل ياري ياريدن
زهراني آلدي حقي گيدن شهرياريدن
ايتميشدي چون وصيت اوزي ويردي غسليني
دفنين ايشيت قلمده اولان انتساريدن
زهراني تا يتورديله قبرين كنارينه
باخدي مزاره ساقي كوثر كناريدن
توكدي عذاره گوز ياشيني ياندي آغلادي
بير آه سرد چكدي دل داغداريدن
امر ايلدي جريده لري ايتديلر خموش
كام آلدي شب او سرور شب زنده داريدن
شهر مدينه خلوت و خاموش و بي فروغ
عالم سكوت محض شب مرگباريدن
محبوس سينه لرده نفسلر نه وار مگر
كيم آيريلور او دامگه مستعاريدن
آغلاديلار صحابه ولي شمع تك خموش
آلميشدي مشق گوزلري ابر بهاريدن
سلمانيدي اباذر و مقداد بولمورم
تشييع ايدن او بانوي والا تباريدن
قبرين كنارينه يتوروب قويدولار يره
افسرده دل او حادثه ناگواريدن
امر ايلدي امام كه مندن كنار اولون
يوز دوندرون بو درد و غمي بي شماريدن
پيغمبرين قيزين من اوزوم قبره تاپشوروم
پيغمبري خلاص ايليوم انتظاريدن
امر امامه ايلدي اصحاب امتثال
آيريلديلار او محفل پر آه و زاريدن
تا بزم راز خلوت اولوب غير قالمادي
آيريلدي صبر و تاب او شه بردباريدن
بير قالدي نعش فاطمه بير مرتضي علي
درياي صبري سالدي بو غم اختياريدن
حسرتله باخدي بير او يارالي جنازيه
آخدي سرشگي ديده گوهر نثاريدن
گوردي خزان لهيبي ايله سولدوروب گلين
ذوق و صفا غلاقه كسوب لاله زاريدن
بير قدر درد دل ديدي بير قدر آغلادي
اسگيلمدي شراري دل پر شراريدن
زهراني بير محبتيله باسدي باغرينا
هجرانه توشه اخذ ايلدي وصل ياريدن
بيرده سيخيلدي بير بيرينه داغلي سينه لر
آيريلدي آيريلانمادي مولا فشاريدن
سسلندي قالدي فاطمه ديدار محشره
بو آير يليق عليني سالار اعتباريدن
ايكاش اجل گلوب مني ده راحت ايليه
سن سيز نه خير عالم ناپايداريدن
دنيايه باخ علي ئولومون آرزو ايدير
فرياد گردش فلك كج مداريدن
زهرا جنازه سي نيه گيزلينجه دفن اولور
بولمنز هامي بو سري سوروش هوشياريدن
دشمن هراسي بير نچه مخطور ناگوار
خيبر شكن عليني سالوب اقتداريدن
مجبور اولوب بتوليدن اوز الفتين كسوب
مرگ ايتدي عندليب گلي جور خاريدن
آغ زلفي سولان يوزوني قويدي تپراقا
تار اولدي روزگار علي شام تاريدن
فرمايش ايتدي فاطمه شرمنده ام اوزوم
مجروح سينه دن بدن زخمداريدن
بير خواهشيم بودور كه عليني گذشت ايله
چوخ دردسر يتوب سنه بو شرمساريدن
سن مندن اوتري جانيوي سالدون بلالره
چكدون او قدر رنج و اذيت شراريدن
دويدون حياتيدن اوزيوه ايستدون اولوم
هر بير فريضه دن صورا پروردگاريدن
گيتدون اوزون عم اوغلوي قويدون شكسته دل
هجرون قرار آلار بو دل بيقراريدن
پيغمبرين حضورينه مندن يتور سلام
عرض ارادت ايت بو ملول و فگاريدن
عرض ايله غصب اولوندي جفائيله حقيميز
آگاه قيل او شاهي سرانجام كاريدن
هر شكوه يا گلايه آپارسان آپار ولي
هرگز آپارما اد ستم آشكاريدن
سيلي حكايتين در و ديوار صحبتين
مستور ساخلاسن او شه تاجداريدن
كشف ايتمه اسدي گلشنه باد جفاي خار
بير غنچه پرپر اولدي بيزيم شاخساريدن
اما ديسن دي من ايله دلدن سيزيلدارام
آلديم توان و طاقتي هر رهگذاريدن
آخر ايويمده آغلاماقا مانع اولدولار
صحراني اختيار ايلديم اضطراريدن
تنگ ايتديلر بو وسعتيله ير يوزون منه
كسديم علاقه جبريله دار و دياريدن
گلديم حضوريوه بوله سن سرگذشتيمي
باخسان يارالي جسميمه نيلي عذاريدن
امت رعايت ايتمدي شرط امانتي
گويا يوخيدي واهمه روز شماريدن
((خوندل)) بولار ذخيره دي فرداي محشره
نه شعريدن حساب ايله نه شاهكاريدن
*
به قول مرحوم حاج حميد طهباز يك مورد از اين اشعار را خوندل براي ايشان سروده بودند .
فريضه دن صورا هر گون ديردي يا الله
يورولموشام منه خوشدور بو عمر پاياني
عنايت ايله خدايا وفاتيمي ياخون ايت
جهاني نيلورم اي عالمين جهانباني
دعاي فاطمه اولدي اجابته مقرون
چكوبدي بستر مرگه او روح ايماني
او نازنين بدني غصّه لر ايله اريدوب
شبيه ايدوبدي هلاله او ماه رخشاني
بؤلوم : حضرت زهرا(س) یازار : hasanfatemefard 0 باخیش
اذان بلال
+0 به يه ن
نام شاعر : محمد حافظ قرآني
خدا آديله او فعليكه ابتدا اولماز
قصور كامل اولار فعله ابتدا اولماز
خدا آديله اودور باشليرام بو مطلبي من
خدادن اوزگه سينه اتكا سزا اولماز
بلال شوري بلالي باشيمدا، الده قلم
اگرچه لايق شأني سوزوم ادا اولماز
ايدوبدي شور پيمبر بلالي شوريده
ايله مهيّج و پرشور ماجرا اولماز
مؤذن نبوي پيرو حقيقتيدي
مجاز اهلي اولان قلبيده صفا اولماز
همينكه ايلدي رحلت پيمبر رحمت
گوروب رعايت مصداق اِنَّما اولماز
اذاني ترك ايلدي ويرمدي بلال اذان
ديدي كه خادم شه خادم گدا اولماز
نقدر ايتديله خواهش بلال اذان ويرسون
جواب ويردي بو منظور مطلقا اولماز
ابي قحافه نون اوغلي خلافته يتسون
موافق نظر ختم انبيا اولماز
علي وصيّ بلافصل حقي غصب اولسون
بو امره آند اولا اللهه حق رضا اولماز
سفارش ايلدي بير گون اوزي خانم زهرا
بلال اذان ديمه سن درديمه دوا اولماز
بابام پيمبري چوخ گوگلوم ايستوري هرچند
سنه امام جماعت او مقتدا اولماز
سسون گَلنده دوشر ياديمه رسول امين
منه تسلّي دل اوزگه بير صدا اولماز
بلال گوردي بتولين سوزين يره سالسا
موافق دل سلطان اوليا اولماز
گلوبدي مسجد پيغمبره اذان ديماقا
زمان اگرچه دونوب بيرده مامَضي اولماز
بلال حزن تماميله سويلدي تكبير
گورن ديدي بيله محزون ايدن صلا اولماز
ايشيتدي فاطمه تكبيري ايلدي تكرار
ديدي كه اوزگه سي مستوجب ثنا اولماز
دينده اشهد ان لا اله الا ا...
خانم بويوردي خدادن سوا خدا اولماز
اوچومجي فصلين اذانين ديَن زماندا بلال
قيامت اولدي ديسم گر، سوزوم خطا اولماز
پيمبر آدي سالوبدور مدينيه بير شور
كه حشريده ايله بير شور غمفزا اولماز
قاريشدي بيربيرينه آغلادي اناث و ذكور
جهان نه قدر اولا ايله بير بكا اولماز
مدينه دن فلكه وا محمّدا اوجالوب
ايله ياران جگري وا محمّدا اولماز
آتاسينون ايشيدنده گوزل آدين زهرا
ديدي خراب ندن ارضيله سما اولماز
بابا بابا ديدي ازبس يخيلدي ضعف ايلدي
بيله وفالي قيز ايله رئوف آتا اولماز
خبر ويريلدي بلاله دايان بتول اولدي
كسوب سسين ديدي بيرده بو سس رسا اولماز
خيال ايدوب آلا ثاني بلالدين بيعت
او حاضر اولماسا بير عدّه هكذا اولماز
بلاله عرصه ني چوخ تنگ دوتدي اول بي دين
ديدي خليفيه اولماق كم اعتنا اولماز
تانور هامي اوزونه پيشوا ابوبكري
تانوماسان اوزيوه سنده پيشوا اولماز
دوتوب او دست خطا كاريله گريبانين
ديدي اولونماسا بيعت يخن رها اولماز
غلاميدون سني بوبكر آلوب ايدوب آزاد
بو فاش مطلبي ايتماقليق اختفا اولماز
بلال سويلدي حاشا ايدم اونا بيعت
او فعلي ايلمرم كه خدا رضا اولماز
پيمبر امر ايدوب آلدي او ايلدي آزاد
بو كلمه حقّيدي انكار حق سزا اولماز
ولي مني گينه قيترسه ايتسه قول اوزينه
وار اختياري جوابينده حرف لا اولماز
دوباره قول اولوب اوز عمريمي باشا ويرّم
جزاده خصم منه شافع جزا اولماز
اوتان حيا ايله صحّاك زاده شرم ايله
تعديات اولي گيزلينده برملا اولماز
منيم گيچوبدي چوخي عمريمون آزي قالوري
دوباره عمر جهاندا منه عطا اولماز
جهان فنادي ولي عمر آخرت باقي
بُلن يانندا فنايه بقا فدا اولماز
ايشيتدي بو سوزي خطّابين اوغلي غيظه گلوب
ملاطفت ديدي هرگز سنه روا اولماز
خلاصه بيعت ايله يا مدينه دن چيخ گيت
قبول اوزگه تمنّا و التجا اولماز
بلال گوردي گرك كوچ ايده، يوخ اوزكه علاج
رعايت حرمتي اوردا قالا اولا اولماز
مينوبدي ناقه سيني چيخدي شهر يثربدن
قبول ايلمسه گوردي انزوا اولماز
ديار شامه گيدوب بلكه غصّه سي آزالا
اگرچه اهل ولادن بلا جدا اولماز
ياتوبدي بير گئجه پيغمبري ايدوب رويا
ايله غلام ايله مولاي ذوالعلا اولماز
محبّتيله رسول خدا بويوردي بلال
وفالي دوست بو تيزليقدا بي وفا اولماز
سبب نه اولدي عليدن نه تيز بيله دويدون
زمان سختيده بيگانه آشنا اولماز
دمشقي سن نيه ويردون مدينيه ترجيح
مگر دمشقيده دنياي دون فنا اولماز؟
بلال اوياندي اوزي نفسيني مخاطب ايدوب
ديدي بو ظلميدي بوندان بيوك جفا اولماز
علاوه ناخوشيدي سن گلن زمان زهرا
اونا اگرچه سنون گيتماقون دوا اولماز
گينه عيادتي لازيمدي دلشكسته دي چون
اونون عيادتي بي اجر و بي جزا اولماز
دوشوب بو فكره قِييتسون مدينيه بيرده
اگر قِييتمسه شرط وفا ادا اولماز
دوباره يثربه گَلدي دمشقيدن غمگين
اونون او حالي كيمي حال غمفزا اولماز
قالوب ولي متفكر ايكي مرام اوسته
كه هانسيني ايلسم نقض مدعا اولماز
گيدوم زيارت پيغمبره ازل گوره سن؟
و يا عيادت زهرايه كه صورا اولماز
اگر زيارت پيغمبره ازل گيتسم
گلايه مند يقينيمدي مرتضي اولماز
اولار پيمبرين امّا خلاف رفتاري
يقين رضا اونا پيغمبر خدا اولماز
اوزي گَلنده سفردن هميشه پيغمبر
گوزوم گوروب اونا بو كلمه افترا اولماز
ازل گيدردي قيزي فاطمه زيارتينه
اونون ايشي سوزي كه وحي دن سوا اولماز
گيدوم عيادت ايدوم بس ازلده زهراني
صورا بير ايش اولي موقعده اقتضا اولماز
مصمم اولدي علي دودمانينه گَلسون
ايله غلام وفادار و پارسا اولماز
گَلوب دوگوب قاپوني گور غلاميده ادبي
اجازه ايستمه ميش داخل سرا اولماز
گوروم عذابيوي ثاني خدا شديد ايلسون
سنون كيمي بو خلايقده بي حيا اولماز
او محترم قاپوني ظلم اوديندا يانديردون
و حال آنكه بُلوردون تايي بنا اولماز
ايدوم خلاصه بلالين حكايتين تعقيب
تمامه يتميه ناقص اگر قالا اولماز
خبر بودور حسنينون بيري گَلوب قاپيه
منيم عقيدمه امّا بو سوز بجا اولماز
گرك قاپوني آچان شاه كربلا اولسون
قاپي آچان او اولان يرده مجتبي اولماز
آچوب قاپوني بلالي گوروب سلام ايلدي
بلاله صبح خيال ايله گور مساء اولماز
باخوب حسينه گوروب حالي چوخ پريشاندور
يوزي ايله سارالوب كه ايله طلا اولماز
دولوب پياله تك اشكيله نرگسي گوزلر
بُلوب او حال بدون غم و بلا اولماز
ديدي او گوزلره قربان اولوم آنان نجه دي؟
شِفا تاپوبدي؟ دوا دردينه و يا اولماز
اوره كلنوب توكوب اشگين يوزه حسين ديدي
توكم سرشگيمي عمريمجه اكتفا اولماز
آنام وفات ايليوب قالموشام بلال آناسيز
مگر آناسيز اوشاقلار گوني قرا اولماز
اوشاق آناسيز اولونجا اوزي اُله ايكاش
چتين آنا اُلوموندن بير ابتلا اولماز
گئجه گونوز باجيم اوخشار بيز ايلروق ناله
آتامدان اوزگه بيزه كيمسه هم صدا اولماز
آتا نه قدر اولا مهربان بوني بُلوسن
گينه آنا يري ويرمز گَلوب آنا اولماز
قالوب سسي قولاقيمدا قاپي يانان گوندن
او نوع حادثه واقع ايله بداء اولماز
ديوب بو سوزلري قويدي يوزون يانان قاپيه
ايله سيزيلدادي بير ني ده اول نوا اولماز
ديدي بلال آناما بوردا بير يارا دگدي
يتر تمامه بو دنيا ايله يارا اولماز
بو آستانيه آخدي او ياره نين قاني
نه قان كه ويرسله دنياني خونبها اولماز
چاغوردي فضّه ني گَل فضّه گَل بالام اُلدي
اياقه دورماقا منده داخي قوا اولماز
دي حافظي آدي اسلام ادّعا ايدنه
بشرده دين اولي تزويريله ريا اولماز
بؤلوم : حضرت زهرا(س) یازار : hasanfatemefard 0 باخیش
اذان بلال
+0 به يه ن
نام شاعر : حسين حسني
مدينه اهلي ناگهان ايشيتديلر اذان سسي
ايشيتميوبله بير نچه زماندي كه همان سسي
او گوندنيكه حضرت رسول رحلت ايليوب
ابي قحافه اوغلونا او خلق بيعت ايليوب
بلال اذاني ترك ايده تلاش و همّت ايليوب
ديوب بلالدن داخي ايشيتمه سوز اذان سسي
ديدي موذّن نبي اذانچي اولماز هر كسه
چتيندي شاهباز اولان اولا شكار كركسه
بودور نهايتي اُلوم حيات رشته سين كسه
گَلور قولاقه دمبدم دَراي كاروان سسي
نه قدر وعده ويرديلر، نه قدر خواهش ايتديلر
بير آزجا قورخودوبدولار، بير آز نوازش ايتديلر
قاباقكي تك اذان ديسون اونا سفارش ايتديلر
ديدي محال اولار عيان ايدم اولان اذان سسي
سفارش ايتدي فاطمه بلاله امتحان ويره
بابامي گوگلوم ايستوري گنه گيدوب اذان ويره
ديون بلال اذان ديوب بو مرده جسمه جان ويره
اونون اذان سسي گَله گَلر بو جانه جان سسي
بلاله غملي موقعي يتوب سفارش بتول
توكوب عذاره گوزياشي ديدي موذّن رسول
اولور كه فاطمه سوزون بلال ايشيتمه سون، قبول
او ايستيوب حق ايستيوب بو خسته ناتوان سسي
چتيندي غملر آيريلا، انيس اولوب بلاليله
اوزين يتوردي مسجده اذان ديه ملاليله
ديوبدي اللهين آدين قاباقكي تك جلاليله
اودور قالوبدي خلق آرا آديله جاودان سسي
دوشوبدي خلق حيرته، مناره دن اوجالدي سس
خيال ايدوبله بيعته بلال ايليوب هوس
تفحّصيله بُلدولر نه علّته سينوب قفس
قونوب گل اوسته قوزانوب هزار داستان سسي
بُلوبله امر فاطمه جوابينه ديمز او لا
خليفه بُلمز آيريسون وليّ حق اولا اولا
چتين بلال صبر ايدر رسول گلشني سولا
گُلون گيدر طراوتي كسيلسه باغبان سسي
ايكيمجي فصلينه اذان يتوب گَلوب مرام اَله
اوچومجي فصلي ذكر ايدوب موثّر اولدي هر دله
سالوبدي شهر يثربه او سس عجيبه ولوله
اوجالدي عرشه ناگهان فغان و الامان سسي
ايشيتدي تا آتاسينون آديني خيرة النّسا
آخوبدي گوزياشي يوزه ديدي بابا بابا بابا
نه قدر گوز جفا ايدوب منه بو قوم بي وفا
اوجالدا بُلمورم بابا ايويمده ده فغان سسي
توكوب عذاره گوز ياشي زبس ايدوبدي غم اثر
يخلدي حاليدن گيدوب، بلاله ويرديلر خبر
دايان كه اُلدي فاطمه، سسين كسوب او خوش سير
دوشوبدي لرزه جانينه باتوبدي ناگهان سسي
سسين كسوب ديدي بو سس داخي چتين رسا اولا
اگر رسا اولا گرك امامي پارسا اولا
گيچوبدي عمريمون چوخي بير آز قالور مسا اولا
قوجالموشام داخي چتين سسيم اولا جوان سسي
بلال اذاني خاطره گَتوردي آيري بير اذان
اودور سرشك حسرتيم عذاريمه اولور روان
حسين اذان ديور دوشه يولا او خسته كاروان
اذان سسيله هم زمان اوجالدي بانوان سسي
باجي ايشيتدي قارداشي گَلوب دله اذان ويرور
اذان ويرنده ياره لر دوباره تازه قان ويرور
بو قان او تازه نهضته حيات جاودان ويرور
قولاق ويرنده هر زمان گَلور گيچن زمان سسي
بؤلوم : حضرت زهرا(س) یازار : hasanfatemefard 0 باخیش
شهادت حضرت زهرا-اثر صراف
+0 به يه ن
نام شاعر : مرحوم حاج رضا صراف تبريزي( صراف )
چون محبت بزمي خلوت‌دير عم‌اوغلێ يا علي
گل ائد‌ك صحبت غنيمتدور عم‌اوغلێ يا علي
بير دقيقه قوْيماديم عالمده قلبين شاد اوْلا
درد و محنتد‌ن مبارك خاطرون آزاد اوْلا
چوْخ اذيتلر سنه وئرديم ائوون آباد اوْلا
ايندي وقت رفع زحمتدور عم‌اوغلێ يا علي
دويمادێم بۇ عالم الفتده سندن آغلارام
قبرده هم ائيلرم شوريله شيون آغلارام
آغلاما مندن سورا سن آغلاسان من آغلارام
باخمارام فردوس جنتدور عم‌اوغلێ يا علي
دوْققۇز ايل اوْلدۇم بۇ دولتخانه‌ده همسر سنه
متّصل وئرديم بۇ دوْققۇز ايلده درد سر سنه
ايندي گل اگلن باشێم اۆستۆنده سرتاسر سنه
عرض ائديم نئچه وصيّتدور عم‌اوغلێ يا علي
اوّ‌لا عرضيم بۇدۇر اؤلسم اگر بۇ گۆنده من
اؤز الينلن وئر گئجه غسليم، گئجه ائيله كفن
ويرسا ال تابۇتيمه بيگانه راضي اوْلما سن
روحيمه آرتوق اذيّتدير عم‌اوغلێ يا علي
ثانيا مندن سوْرا اي خسرو گردون مدار
عورت آلسان بير نجيبه عورت ائيله اختيار
غم گۆني تا زينب و كلثومه اوْلسۇن غمگسار
ائيلسون هر نوع حرمتدور عم‌اوغلێ يا علي
بيرده قلبون مجتبي دن اينجيه هر آن سنين
گئچ حسينيم جانينه من جانۇا قربان سنين
قوْيما غم چكسون خصوصا جان حسينون جان سنون
چون او جديند‌ن امانتدور عم‌اوغلێ يا علي
من بۇنۇن چوْخ زحمتين چكديم نه آسان بسلديم
پرورش وئرديم گۆل اۆسته طرفه ريحان بسلديم
سسله ينده جان دمنده جان دئديم جان بسلديم
چون جفاسي جانه منّتدير عم‌اوغلێ يا علي
بۇ حسيني كيم سنه تاپشێردێم ايندي رو به رو
دقّتيلن باخ نئجه وئرسم ائله آللام گرو
باش بدنده، بارماق الده، ال بيلكده مو به مو
گؤر هامێ عضوين سلامتدور عم‌اوغلێ يا علي
چوخ مكدّر اوْلسا وار بۇ سؤزده درد سر يئري
ياخشێ باخ سالێمدو برگ گۆل تك آخر هر يئري
نه باشێندا وار قيليج نه سينه‌ده خنجر يئري
نه بدن يكسر جرا‌حتدي عم‌اوغلێ يا علي
نور ديده‌مدور حسين باعثدي چون گؤز ياشيمه
من گؤزۆمد‌ن سالمامێش سن تاپشێر آل هاشمه
واي او گوندن كيم گورم باشين كول اولسون باشيمه
ايستي كۆللــر اۆسته راحتدور عم‌اوغلێ يا علي
عاشق جانبازدور گيرم حسينيم يوخ سؤزۆم
من ده نقد عشقي خرج ائتمكده صرّافم اؤزۆم
بير بدن دؤرت مين يارا لاكن نئجه گؤرسۆن گؤزۆم
گؤر بۇ انصاف و مروتدور عم‌اوغلێ يا علي
بؤلوم : حضرت زهرا(س) یازار : hasanfatemefard 0 باخیش
آنا نعشينه دوشنوب حسين آنا واي ديوب حسن آغلادي-اثر شهاب
+0 به يه ن
زبانحال امام حسين(ع)در شهات حضرت زهرا(س)نام شاعر : مرحوم ميرزا يوسف شهاب تبريزي
آنا نعشينه دوشنوب حسين آنا واي ديوب حسن آغلادي
كفن ايچره ايله سيزيلدادي باش اچيب اباالحسن اغلادي
انا واي ديوب حسن اغلادي
ايكي شاهزاده اي خونجگر ايله گلدي شيونيله ديله
ايكي اندليب شكست ه پر ديه سن گونوبدي سولان گله
اولارين فغاني غم آرترور هامي بلبله گله سنبله
يري وار ديم بو مصيبته گل و گلشن و چمن آغلادي
حينينون ايلدي ناله سي كفن ايچره فاطميه اثر
آچيلوبدي بند كفن آچوب قولين اول بلا كش خون جگر
ايله چكدي سينيه جان كيمي حسنيني توكدي سرشك تر
خانمين او كشف كرامتين او جلالتين گورن آغلادي
نه دليله من ايليم بيان نه ئميش جلالت فاطمه
سالوب اهل عالمي حيرته او جلال و شوكت فاطمه
بوني بير خداي جهان بلور كه ندور شرافت فاطمه
او شرافته او مصيبته ايدوب انجم انجمن آغلادي
ايله بير مجلله بير خانم نه جهاندا كيمسه نشان ويروب
ايله بير جلالتي بير كسه نه خداي كون و مكان ويروب
بيله شان صاحبينه ديمه كه بير اني غصه امان ويروب
النه كيمي آتا واي ديوب توكوب اشك ديده دن آغلادي
او مقام و مرتبه صاحبي آتاسي خلاصه اي انبيا
قوليني سالاردي گورن كيمي گوزي نوري فاطمه بويننا
گهي سينه سين گه الين اوپوب//بالاما ديردي اوزوم فدا
بو سوزي دينده گورديلر او رسول ممتحن آغلادي
بويوروردي سيز بيله بولميون آتاليق محبتبن ايلرم
بو محبت امر الهي دور من اونون اطاعتين ايلرم
بير علاوه مد نظر كه بو بالامين مصيبتين ايلرم
گترور ملال و مصيبته مني بو غم و محن آغلادور
بو قدر مصيبت و غم چكن بو يقيندور عالمه گلميوب
آتادان سورا گئجه آغليوب گونوز آغليوب يوزي گولميوب
خبر صريحيدي بو خانم كه شهيد اولوب اوزي الميوب
بدنينده صدمه ئيرين گوروب اوئيدي ابالحسن آغلادي
بو خانم جوانه وفات ايدوب ايليبدي ترك جهان جهان گيدوب
او آز عمريله آغاروب ساچي بوكولوبدي قدي كمان گيدوب
بدننده قمچيلرين يرين ايكي قولاريندا نشان گيدوب
آتاسي بهشته گورن كيمي گويروب او گل بدن آغلادي
ايلمشدي خاتم الانبيا اوزي امته بو وصيتي
قويورام ايچوزده سيزون بوگون//بو ايكي گرامي امانتي
بريسي كلام مجيديدي بريده همين بو اوز عترتي
بو كلامي هر ايشيدن يانوب بو وصيتي ايدن آغلادي
او وفاسيز امته باخ عجب عمل ايلدي بو وصيته
توكولوب جفائيله اود وروب نجه گور او باب رسالته
قيزي فاطمه دوتوب اوديانوب نه ديوم كه دوشدي نه حالته
او اسفلي حاله كناريدن نظر ايلين گورن آغلادي
او حسينجانه ني حق گوروم اوزي پايدار ايده هر زمان
واريدي{شهابيله}هر گئجه نچه يار هم دل و هم زبان
سبب اولدي اوردا بو نوحيه او جوان سيد نوحه خوان
آناسي يقين نظر ايتدي كيم ايشيدن گورن بولن آغلادي
بؤلوم : حضرت زهرا(س) یازار : hasanfatemefard 0 باخیش
