باشيمه دوشدي گينه شوق هواي كربلا       

آتشين   دلدن  گلور  ني تگ  نواي   كربلا

كربلا شوقي  اگر چه  واريدي  دلده  كرار      

آتش حسرت سالوردي قلبيمه دائم شرار

اولماميشديم هيچ زمان اما بو قدري بيقرار    

آلماميشدي  صبريمي الدن  هواي  كربلا

دسته دسته هي دوشور هر گونده زواري يولا 

نار حسرت شعله سي آرتارگوگلده برملا

سسلرم  آهسته   دلدن  كربلا  يا   كربلا       

كشتي  صبريم  سينوب  اي ناخداي كربلا

كربلا  آدي  گلن  وقته   گيدر  دلدن  توان       

چشمه چشميم اولور خط عذاريمدن روان

جلوه  ايلر  گنبد و صحن ابوالفضل جوان       

نصب  ايدوب  اوردا  لوا  صاحب لواي كربلا

اي اولان هر دردمندين دردينه آدي دوا         

تربت   قبر   شريفي   عالمه   خاك   شفا

بو مرضدن جانه گلديم  قبريوه جانيم فدا       

 دردمندم   آختارور   درديم   دواي     كربلا

آرزوي    كربلا    الدن   آلوب    آراممي           

امر ايله عباسوه  لطفيله وئرسون كاممي

دفتر زوار  دربارونده  يازسون   ناممي            

نه گوزل  يردور  او  ير اي من فداي كربلا

بير نولور بو جمعيله پائين پايوندا دوراخ           

نوجوان  اوغلون   علي اكبره  ماتم قوراخ

سس چكاخ ايواي حسين واي سسلياخ سينه وراخ 

عالي بير لذت وئرور روحه عزاي كربلا

ياد ايداخ شاها او وقتي قلب بي آراميله         

يوز يوزه قويدون ئوز اوغلون اكبر  ناكاميله

ايله  زيبا   قامتيله  ايله  خوش  انداميله         

تاپدي   زينت   روز   عاشورا   مناي   كربلا

بيرده گورسيديم او شمع وصلوه پروانيم         

قبرون  اطرافين  دولانام  عاشق  ديوانيم

دوزدي من اصل حقيقتدن ئوزوم بيگانيم         

ليك  لطفون  اولسا  اولام  آشناي  كربلا

بار   الها     قسمت   ايله    آرزومندانيله           

قول  سالاخ  قبر  حسينه  ديده   گريانيله

باشلياخ بير شعر و نوحه ناله و افغانيله          

باشلاسون شوريله (شاني) ماجراي كربلا