گلچين حسيني
ابوالفضل ع نوحه سي-اثر غمناك
+0 به يه ن
ابوالفضل ع نوحه سي
نام شاعر : غمناك
كتاب: منشور عاشورا جلد سوم – ص 206
دور اي سوسوز وئره ن جان، كوي وفاده قارداش
قولسوز دوشوب قالان بو بحر-ي-بلاده قارداش
گلديم بو بحر غمدن جسمون چكه م كناره
غرق اولموسان گلينجه من ايله ييم نه چاره
گلمه ز اليم الوندان ايمدي دوتام دوباره
گؤرره م الون اولور بو درديم زياده قارداش
دريا كيمي تلاطم ائيليب گروه-ي كافر
غرق ائتدي پاره جيسمون، سئيلاب تيغ و خنجر
دور اي شكسته كشتي درياده سالما لنگر
طوفاندي گردباد-ي-غمدن هواده قارداش
سؤز يوخدي حق يولوندا سن اؤز اؤزون آتيبسان
طي-ي-مراحل ائيليب سر منزيله چاتيبسان
اما منه چتيندي بو نوعيله ياتيبسان
سن سيز گليبدي گؤگلوم فرياد و داده قارداش
چاره م آزالدي سن سيز سيندي سيندي بئليم برادر
ياتدي علم پوزولدو اوردو داغيلدي لئشگر
يالقيز اؤزوم بو قدري دوشمن نه يار و ياور
يوخ بير كسيم يئتيشسين بو چؤلده داده قارداش
بؤلوم : حضرت ابوالفضل(ع) یازار : hasanfatemefard 0 باخیش
چند شعر از كاتب در رساي حضرت ابوالفضل(ع)
+0 به يه ن
سينه زن – حضرت عباس
نام شاعر : كاتب اردبيلي
ديوان كاتب جلد دوم – ص 172
تئشنه لر ناله سي قارداش گتيريب جانه مني
وئر اجازه يولا سال جانب-ي-ميدانه مني
وار نه باكيم قوشونا يوخدو اگر حد-و-حئساب
الده كسگين قيليجيم واردي ركابيمده عئقاب
گر شياطين اولا بو قوم منه تير –و- شهاب
وئر اجازه يولا سال جانب-ي-ميدانه مني
هر قباييلده بيليرسن آديمين شؤهره تي وار
دوشمن و دوست بيلير منده علي صولتي وار
زاده –ي شير –ي-خدايم قولومون قوّتي وار
وئر اجازه يولا سال جانب-ي-ميدانه مني
ائذن وئرسن گئده رم دوشمنيله جنگ ائده رم
حيدرانه قوشونا عرصه گهي تنگ ائده ره م
خون-ي-اعداني تؤكوب بو چؤلو پررنگ ائده رم
وئر اجازه يولا سال جانب-ي-ميدانه مني
گر ايماميمده ن اولا اذن من-ي-خونجيگره
آچارام آب-ي-فراتين يولونو خئيمه لره
سو يتيرره م بو زامان عترت-ي-خيرالبشره
وئر اجازه يولا سال جانب-ي-ميدانه مني
نه روا سو يولونا عترتون حسرتله باخا
اذن وئر عباس عقاب اوسته چيخا
صفلري برهم ائده لئشگري اوست اوسته ييخا
وئر اجازه يولا سال جانب-ي-ميدانه مني
طاقتيم يوخدو گؤره م تئشنه علي اصغريمي
ائشيده م العطش عترت-ي-پئيغمبريمي
قويموشام من سو يولوندا ايكي اوزون اللريمي
وئر اجازه يولا سال جانب-ي-ميدانه مني
ديوان كاتب جلد دوم – ص 187
ييخيب دوشمنلريم قارداش مني ميدان آراسيندا
يئتيش فرياديمه قويما مني عدوان آراسيندا
گل ايندي گؤر علمداري
اولوب قاني سو تك جاري
خيامه سو گتيرمكده نه قدري سعي ائده ر ديم من
نه چاره اولمادي مومكون آليب اطرافيمي دوشمن
نه قول قالدي نه سو مشكيم، خجالت اولدوم اصغردن
دگيب ازبسكه اوخ جسميم قاليب پئيكان آراسيندا
سينيب شهپر دوچار اولدوم بو اعداي جفاجويه
قاليبدير گؤزلريم يولدا باخار حسرتله هر سويه
اوره كده مطلبيم واردور باخام بيرده او مه رويه
گل ايندي قويما عباسي غم-ي-هجران آراسيندا
باغيشلا خئيمه گاهه من گله نمه م سن گل ايمداده
ستمله كسمه گه باشيم اولوب قاتللر آماده
قوشون دريا تك هرياندان گلوب موجه بو صحراده
قاليبدير زورق-ي-جسميم اخا طوفان آراسيندا
شكايت ائتمه رم دوشمن ايكي قوللاريمي سالدي
مني بو يانديرير قارداش سكينه منتظر قالدي
او طفل-ي-مضطرون آخير سوسوزلوق طاقه تين آلدي
رضايم غيرتيمدن من وئره م جان قان آراسيندا
ديوان كاتب جلد دوم – ص 198
آچ گؤزلرون نظر قيل صاحب-ي-علم ابالفضل
جرات تاپيبدي سن سيز قوم-ي-ظلم ابالفضل
يالقوز گؤروب حسيني آلميش آرايه دشمن
گول جيسمينه وورارلار تير و سنان ابالفضل
هانسي لعين ستمله سو مشكون اوخلاييبدير
عطشان قاليب تماما" اهل-ي-حرم ابالفضل
سينديرديلار بئليمي يوخ طاقت –و –توانيم
هجرونده ائيله ييبلر قدّيمي خم ابالفضل
ديوان كاتب – ص 201
سالديلار قولوم قارداش
ساقيلا سولوم قارداش
تئز گل باشيم اوستونه
قوربانون اولوم قارداش
بؤلوم : حضرت ابوالفضل(ع) یازار : hasanfatemefard 0 باخیش
عاشورا رجزي-اثر ذهني زاده
+0 به يه ن
عاشورا رجزي
نام شاعر : مرحوم ذهني زاده(سائل)
كرب و بلا چؤلونده طوفاندي يا محمد
گؤندر كفن حسينه عورياندي يا محمد
مئهمان ايديبله دعوت قويموللا احترامين
سو ويرمئييبله بالله عطشاندي يا محمد
سقا گيديب فراته قويموبلا سو گتيرسون
بير شربه سو گتيرسه احساندي يا محمد
گل كربلا چؤلونده بير اوغلووا نظر قيل
گول تك يئر اوسته جيسمي خنداندي يا محمد
ابري-ي-ظلام دوتموش دشت بلاني يكسر
بير ابر باريشين گؤر پئيكاندي يا محمد
لئيلا نوايه گلميش سسلر هرايه اوغلون
هجر آتشينده قلبي سوزاندي يا محمد
دوشموش يانان چاديردا اصغر آناسي بيهوش
جانين آليبلا گويا بي جاندي يا محمد
داماد ماتمينده وار اؤزگه بير حكايت
قاندان عروس زولفي الواندي يا محمد
بو كربلا چؤلونده گويا قيامت اولموش
ديللرده وا محمد عنواندي يا محمد
انگشتر اوسته بجدل قطع ايليوب بير انگشت
بو سرّه مين سليمان حيراندي يا محمد
بؤلوم : روز عاشورا یازار : hasanfatemefard 0 باخیش
حضرت علي اكبر ع نوحه سي-اثر حاج اسماعيل زرين
+0 به يه ن
حضرت علي اكبر ع نوحه سي
نام شاعر : حاج اسماعيل زرين
كتاب: منشور عاشورا جلد سوم – ص 174
دور باشون اوسته گلميشه م، گؤزلريمه ضيا اوغول
گل ديله منله بير دانيش، قلبيمه وئر صفا اوغول
گؤر نه چتيندي من گؤره م ظولميله قانه باتميسان
زخملي آهو تك دوشوب ايستي قوم اوسته ياتميسان
سيل-ي-سرشگيمي آخان قانيوه يئرده قاتميسان
بئيله ييخيلماغون ائده ر مرگيمه اكتفا اوغول
سن منه نور-ي-عئين سن، ديزلريمه توان و تاب
روحيم او قدري قالميري آيريلا وئر منه جواب
صوره تيمي اوغول ائديب باشدان آخان قانون خضاب
دور دورا بيلميره م اؤزون اول اليمه عصا اوغول
گتدي او دم كي قاصيد-ي-غم منه غملي بير پيام
يعني قولاقيمه يئتيب اوندا كي دلنشين سلام
بيلديم او دمده قلبيمين بنديني قيردي اهل-ي-شام
دردينه قلبيمين داخي اولماياجاق دوا اوغول
ائيله حيصار-ي-محنته لئشگر-ي- غم ساليب مني
قرب-ي-كناريده گؤزوم گؤرموري غصه دن سني
عرشه اوجاتميشم اودور داد و فغان و شيوه ني
گرچه گولور بو حاليمه دوشمنه بي حيا اوغول
من نئجه يانماييم اوغول سن كيمي نوجوانيمه
سن دانيشاندا هر زمان قوَت يئته ردي جانيمه
دست-ي-قضا سپيبدي غم توپراغي دودمانيمه
آغلاياجاق نه قدري وار عمَه باجي آنا اوغول
گؤر نه بو قوم –ي- كينه جو اولدولا حقده ن كنار
ائتدي پيمبر عتره تين بير بئله غملره دوچار
جديمه بنزه ين جوان يئرده دوشوبدو زخمدار
جسم لطيفيوون اولوب هر طرفي يارا اوغول
بؤلوم : شاهزاده علي اكبر(ع) یازار : hasanfatemefard 0 باخیش
عاشورا صوبحو-اثر صحاف
+0 به يه ن
عاشورا صوبحو
نام شاعر : حاج محمد حسين جنتي مقام (صحاف)
كتاب: منشور عاشورا جلد سوم – ص 154
چيخما ائي گون! گل بو گون ائيله حيمايت زينبه
آشكار اولسان اولور برپا قيامت زينبه
پرده-ي-ظلمتده ن اگر اولسان، سن بوگون اي گون كنار
آل-ي-طاهايه اولور اوضاع-ي-محشر آشكار
بير بئله گونده اگر، بيلسه ن طلوعونده نه وار
ائيله سن مطلق بو صحراده اعانت زينبه
لئشگر-ي-كفر و ضلالت بئيرق-ي-ظولمين ووروب
بو بياباندا مقابيل نوريله ظولمت دوروب
سن طلوع ائتسه ن بوگون زينب گونو ائيله ر غروب
كربلا دشتي اولور محشرده ن آيت زينبه
نوريويله سن اگر سالسان حجاباته شفق
غرق اولور درياي غمده ساكنان-ي-نه طبق
باش آچار زهرا گلير فرياده و داده ما خلق
كشف اولور سرَ قيامتده ن علامت زينبه
بو گونون وضعيتينده ن اولسان ائي گون باخبر
اولماسان هرگز بو ظولمت پرده سينده ن جلوه گر
مشرق-ي-غمدن بو گون اي گون عيان اولسان اگر
ائيله سن بي شك هامي آفاقي ظولمت زينبه
بؤلوم : روز عاشورا یازار : hasanfatemefard 0 باخیش
عاشورا گئجه سي نوحه سي-اثر محمود صادري(پارسا)
+0 به يه ن
بو گئجه آل-ي-علي ياتماديلار
شيعه ياتسين نئجه راحت بوگئجه
عاشورا گئجه سي نوحه سي
استقبال شعري
نام شاعر : محمود صادري(پارسا)
كتاب: منشور عاشورا – جلد سوم ص 148
«گول گولزار-ي- رسالت بوگئجه
شئمريده ايسته دي مؤهلت بوگئجه»
نه گئجه عالم –ي-محشر كيمي تار
خوف و تشويشه دوشوب خرد-و-كبار
نور اولوب دستخوش ظلمت و نار
چولقاييب عالمي ظلمت بوگئجه
قصد ائديب مؤهلت آلا خسرو دين
افتخار و شرف-ي- اهل يقين
ييغا اؤز باشينه اهل-ي-حرمين
ائده قورآني تلاوت بوگئجه
دئدي اصحابينه سولطان-ي-حجاز
سيزسيز عالمده منه محرم-ي-راز
حضرت حقه ائده ن راز و نياز
تاپاجاق عين-ي-سعادت بوگئجه
نوش ائده ن باده-ي-پئيمانه عشق
ياناجاق چون پر-ي-پروانه عشق
قالاجاقدور آدي ديوانه-ي-عشق
چكه هركيمسه رياضت بوگئجه
كربلا ايچره اولوب محشر عيان
گوئيا قوپدو قيامت بوگئجه
دوتدو دنيا يوزونو موج-ي-بلا
داشدي درياي-ي-مصيبت بو گئجه
بو گئجه آل-ي-علي ياتماديلار
شيعه ياتسين نئجه راحت بوگئجه
بؤلوم : شب عاشورا یازار : hasanfatemefard 0 باخیش
امام آت دان ييخيليب-اثر ذهني زاده
+0 به يه ن
امام آت دان ييخيليب
نام شاعر : مرحوم ذهني زاده
كتاب: منشور عاشورا جلد دو – ص 228
قطب-ي-عالم ذوالجناح اوسته ن اولان دمده نگون
قالدي اؤز دؤرينده سرگردان سپئهره-ي-واژگون
صدر زين توسنيندن اول خديو-ي-مستطاب
قصد اجلال-ي-نزوليله تهي قيلدي ركاب
اختيار ائتدي ترابي نور-ي-چشم –ي-بوتراب
گؤرسه نيب چرخ-ي-شهادت آفتابينده سكون
كاش او ساعت كي ييخيلدي خسرو-ي-گردون مدار
اؤز مداريندن چيخيب عالم اولئيدي تار-و-مار
طئي ائدئيدي يئكسره طومار عمرون روزگار
لم يكن شيئا" اولئيدي كاينات و كاف و نون
ايستي گونده قوملار اوستونده شهنشاه-ي-حجاز
كثرت ايچره قوردو بير خلوتگه-ي- راز و نياز
سجده حالينده اولوب معبوديله سرگرم-ي-راز
عرض ائديب يا منتهي الامال –ي- كّل العاملون
قوملار اوستو ايستي گون سوز-ي-عطش باس-ي-حديد
ياره لر سوزيشده نار ظولم حيدتلي شديد
هر يارام شوريله بير قان آغلايان چشم-ي-اميد
قانلي پئيكانلار او گؤزلر دورينه قانلي جفون
بؤلوم : امام حسين(ع) یازار : hasanfatemefard 0 باخیش
جناب قاسيم (ع) شهادتي نوحه سي-اثر وافي
+0 به يه ن
جناب قاسيم (ع) شهادتي نوحه سي
نام شاعر : مرحوم محمد تقي وافي
كتاب: منشور عاشورا – جلد دو ص 142
قارداشيم حسن گولوستانينين
گل باجي نيشانين گتيرميشه م
وئر خبر بلاكئش آناسينا؛
قاسيم جوانين گتيرميشه م
صحنه-ي-وجودينده باش وئره ن
ياره لر آچيب گوا چمن كيمي
زينت ائبله ييب قاتلي پئيكرين
نئيزه اوخ نسترن كيمي
بي نوا آناسي نئجه دؤزه ر
گؤرسه اوغلونو من گؤره ن كيمي
من گؤره نده اود دوتموشام يانيب
يانديران زمانين گتيرميشه م
گول دگيل بو گولزار-ي-حوسنو دور؛
وار يئري بونا گوللر آغلاسين
گوللري سولان مرغ-ي-زار-ي-تك
شيوه نيله بولبوللر آغلاسين
فاطمه آنام قارداشيم حسن
واي اوغول دئسين ائللر آغلاسين
گولستان-ي-اعزازيمين باجي
آفت-ي-خزانين گتيرميشه م
تئل به تئل باتان قانه زولفونو
مه جمالينه هاله تك ساليب
زير-ي-ابر-ي-ظولمتده گون كيمي
بو ايشقلانان گوندوزم قاليب
جان وئريب اؤزو تئشنه لب منيم
صبر و تابيمي دفعتا" آليب
گل دوشوب بو گون نطقدن باجي
جسم ناتوانين گتيرميشه م
بؤلوم : شاهزاده قاسم(ع) یازار : hasanfatemefard 0 باخیش
عاشورا گئجه سي رجزي-اثر كاتب
+0 به يه ن
عاشورا گئجه سي رجزي
نام شاعر : كاتب - ديوان كاتب- جلد دوم ص 72
گؤره سن بو گئجه لئيلا نئجه راحت ياتاجاق
كي صباح نازلي علي اكبري قانه باتاجاق
بو گئجه زينب و كلثوم اؤپه ر عباس قولون
كي صباح لئشگر اعدا سالاجاق ساق سولون
بو گئجه شاه –ي-شهيدان دولانار خئيمه لري
بير دويونجان گؤره تا عترت خونين جيگري
بو گئجه خئيمه لر اطرافيني عباس گزه ر
صولتيندن ياتا بيلمزلر اونون قوم كفر
بو گئجه شيعه رباب اصغره لايلاي ديه جئك
كي صباح اوخلاناجاق اوندا اوغول واي ديه جئك
بو گئجه صوبحه كيمين باتماياجاق شئمر-ي-دغا
كي صباح حلق-ي-حسينه قوياجاق تيغ-ي-جفا
بو گئجه كرب و بلا دشتي دولوب لئشگريله ن
كي صباح قان توكولور نئيزه و هم خنجريله ن
بو گئجه اهل-ي-حرم ائيله ر هامي آه-و-فغان
كي صباح قوللاريني باغلاياجاق شئمر-و-سنان
بؤلوم : شب عاشورا یازار : hasanfatemefard 0 باخیش
حضرت علي اكبر (ع) نوحه سي-اثر مولانا يتيم
+0 به يه ن
حضرت علي اكبر ع نوحه سي
نام شاعر : مولانا يتيم
قانون آخديقجا يوزه زولف-ي-مطرّادن اوغول
آپارير تاب و توانا دل-ي-لئيلادن اوغول
سن امامت گونونون كوكب-ي-رخشنده سي سن
نئجه كوكب اوگونون جلوه-ي-تابنده سي سن
جلوه دن دوشسه گونون علّت-ي-زيبنده سي سن
باتا سنسيز يئري وار مشرق-ي-اقصادن اوغول
گؤسته رير ياره لرين خنجر-ي-فولاد اثري
گتدي اظهاره باشين نكته-ي-شقّ القمري
سني بوحاله سالان اي دل-ي-لئيلا ثمري
بهره مند اولمايا هرگيز ايكي دونيادان اوغول
بسله ميشديم سني بو سينه ده چوخ عزّتيله ن
سينه چاك اوللام اوغول ايمدي غم-ي-فرقتيله ن
بارخارام پئيكر-ي-صد پاره وه يوز حسرتيله ن
آه بو درد-ي- دل حسرت-ي-بي جادن اوغول
صورتون حُسن خداداديله سرمايه سي وار
طيّ ائديب حُسن-ي-جمالين نقدر پايه سي وار
عارضون قيرميزي قاندان ائله پيرايه سي وار
گوي سبقت آپاريب هر رُخ-ي-زيبادن اوغول
ايستيره م ناله-ي-دلسوزيمي دلدار ائشيده
ايسته مم شيون و فرياديمي اغيار ائشيده
حئيف دير بولبول و گول صحبتيني خار ائشيده
ناله هر چند برازنده دي ثكلادن اوغول
بؤلوم : شاهزاده علي اكبر(ع) یازار : hasanfatemefard 0 باخیش
