سينه زن – حضرت عباس
+0 به يه ن
سينه زن – حضرت عباس
شاعر : كاتب اردبيلي – ديوان كاتب جلد دوم – ص 172
تئشنه لر ناله سي قارداش گتيريب جانه مني
وئر اجازه يولا سال جانب ميدانه مني
وار نه باكيم قوشونا يوخدو اگر حد-و-حئساب
الده كسگين قيليجيم واردي ركابيمده عئقاب
گر شياطين اولا بو قوم منه تير –و- شهاب
وئر اجازه يولا سال جانب-ي-ميدانه مني
هر قباييلده بيليرسن آديمين شؤهره تي وار
دوشمن و دوست بيلير منده علي صولتي وار
زاده –ي شير –ي-خدايم قولومون قوّتي وار
وئر اجازه يولا سال جانب-ي-ميدانه مني
ائذن وئرسن گئده رم دوشمنيله جنگ ائده رم
حيدرانه قوشونا عرصه گهي تنگ ائده ره م
خون-ي-اعداني تؤكوب بو چؤلو پررنگ ائده رم
وئر اجازه يولا سال جانب-ي-ميدانه مني
گر ايماميمده ن اولا اذن من-ي-خونجيگره
آچارام آب-ي-فراتين يولونو خئيمه لره
سو يتيرره م بو زامان عترت-ي-خيرالبشره
وئر اجازه يولا سال جانب-ي-ميدانه مني
نه روا سو يولونا عترتون حسرتله باخا
اذن وئر عباس عقاب اوسته چيخا
صفلري برهم ائده لئشگري اوست اوسته ييخا
وئر اجازه يولا سال جانب-ي-ميدانه مني
طاقتيم يوخدو گؤره م تئشنه علي اصغريمي
ائشيده م العطش عترت-ي-پئيغمبريمي
قويموشام من سو يولوندا ايكي اوزون اللريمي
وئر اجازه يولا سال جانب-ي-ميدانه مني
بؤلوم : حضرت ابوالفضل(ع) یازار : hasanfatemefard 0 باخیش
حضرت ابوالفضل (ع) نوحه سي
+0 به يه ن
شاعر : غمناك
كتاب: منشور عاشورا جلد سوم – ص 206
دور اي سوسوز وئره ن جان، كوي وفاده قارداش
قولسوز دوشوب قالان بو بحر-ي-بلاده قارداش
گلديم بو بحر غمدن جسمون چكه م كناره
غرق اولموسان گلينجه من ايله ييم نه چاره
گلمه ز اليم الوندان ايمدي دوتام دوباره
گؤرره م الون اولور بو درديم زياده قارداش
دريا كيمي تلاطم ائيليب گروه-ي كافر
غرق ائتدي پاره جيسمون، سئيلاب –ي-تيغ و خنجر
دور اي شكسته كشتي درياده سالما لنگر
طوفاندي گردباد-ي-غمدن هواده قارداش
سؤز يوخدي حق يولوندا سن اؤز اؤزون آتيبسان
طي-ي-مراحل ائيليب سر منزيله چاتيبسان
اما منه چتيندي بو نوعيله ياتيبسان
سن سيز گليبدي گؤگلوم فرياد و داده قارداش
چاره م آزالدي سن سيز سيندي سيندي بئليم برادر
ياتدي علم پوزولدو اوردو داغيلدي لئشگر
يالقيز اؤزوم بو قدري دوشمن نه يار و ياور
يوخ بير كسيم يئتيشسين بو چؤلده داده قارداش
بؤلوم : حضرت ابوالفضل(ع) یازار : hasanfatemefard 0 باخیش
حضرت ابوالفضل (ع) باشي اوسته امام حسين ع سسله نير
+0 به يه ن
شاعر : علي اكبر حامد - منشور عاشورا جلد سه 197
اي عئشق ميناسينده وئره ن جان آتام اوغلو
گلديم يارالي جانيوه قوربان آتام اوغلو
بو باشدي عموديله سينيب دورموري قاني
بو قان آپاريبدير سني ائي حيدر ثاني
اؤلدوردوله تا سن كيمي بير شير ژياني
قارداشيوه ده ال تاپار عدوان آتام اوغلو
سو مشكويوي قارداش كيم ائديبدير بئيله پاره
بو قاندي باشوندان آخيري بئيله عذاره
بو جيسميدي شام اهلي ووروب بير بئله ياره
گول پئيكرون ائيليبديله شان شان آتام اوغلو
ياده كسيلميش قولو سالديقجا يانار دل
بيلميب بو الين حورمه تيني فرقه-ي-باطل
صد حئيف اولا رحم ائتمه دي بو اللره قاتل
قطع ائيله دي اول ناكس دوران آتام اوغلو
باخماييبدي عدو قابل-ي-حورمت دي بو اللر
دين پئيكرينه بير يد-ي-قدرتدي بو اللر
محشر گونو اسباب شفاعت دي بو اللر
زهرانين الينده اولو عنوان آتام اوغلو
بو چؤلده سوسوزلوق اودو چوخ ديللري دلدي
از بس كي آغير قيمته قارداش باشا گلدي
بير مشك سويون قيمتي آيا ايكي الدي
اوستونده ده باش ايستيري دونان آتام اوغلو
ائي آرخام ائليم عترتيمين ياوري قارداش
دور قويما كمك سيز من بي لئشكري قارداش
وئردين سويا ال وورماغا بو اللري قارداش
كيم سن تك ائديب ترك-ي- سر و جان آتام اوغلو
بؤلوم : حضرت ابوالفضل(ع) یازار : hasanfatemefard 0 باخیش
مناجات شوري امام حسين
+0 به يه ن
شاعر : ديوان كاتب
دوشدو آت اوسته ن يئره شافع يوم حساب
عرش برين سؤيله دي ، ليتني كنت تراب
نئيزه دگيب اوخ دگيب اول بدن پاكينه
دوشدو گونون ايستي سي پئيكر صدچاكينه
قويدو مبارك يوزون كرب و بلا خاكينه
گرم مناجات اولوب او شه مالك رقاب
عرض ائله دي ائي خدا بو من و بو كربلا
بو شهدا بو فرات بو صف قوم دغا
من سنيله ائتديگيم عهديمه قيلديم وفا
سنده وفا قيل اؤزون عهديوه يا مستطاب
شوقيله وئرديم فدا ياور و انصاريمي
عفو ائله بو حاليمه جمله عزاداريمي
آتلي پياده گله ن قبريمه زوّاريمي
قويما محبّيم گؤره حشر گونينده عذاب
دوغراسالار هر قدر پئيكريمي راضيم
شئمر سوسوز ذبح ائده حنجريمي راضيم
قطع ائلييه ساربان اللريمي راضيم
شايقم هر ظلم ائده قوم-ي-عدو بي حساب
يوخدو سؤزوم هر قدر بو بدنيم دوغرانا
راضيم اي دوالجناح خئيمه لريم اودلانا
آل-ي-علي قول قولا بير ايپيله باغلانا
بزم-يزيده گئده جمله سي قولدا طناب
يئرده كفن سيز قالا اوچ گونه دين پئيكريم
شامه گئده ظلميله نئيزه باشيندا سريم
شئمره اولا دستگير عترت غم پروريم
ائتمييه محشر گونو شيعه لريم اضطراب
بؤلوم : امام حسين(ع) یازار : hasanfatemefard 0 باخیش
عرصه ي حشره حسين قانينه غلطان گله جئك
+0 به يه ن
شاعر : ديوان كاتب
عرصه ي حشره حسين قانينه غلطان گله جئك
ائتمه گه شيعه لرين دردينه درمان گله جئك
دؤنه جئك روي زمين كوره-ي-حداده او گون
اهل-ي-محشر گله جئك ناله و فرياده او گون
بير بئله وقته حسين دير يئته ن ايمداده او گون
جمله مجريملر اوچون شافع-ي-عصيان گله جئك
بير طرفده ن وراجاق باشلاري الده شهدا
بير طرف صف چكه جئك قوللاري باغلي اسرا
قوياجاق عرصه گه-ي-حشره قدم خيرالنّسا
حقدن ايسته يه جئك عدليله ديوان گله جئك
دوتاجاق الده حسينين او كسيك اللريني
بجده لين كسديگي انگشت ايله انگشتريني
ايكي قوللاري ابالفضل-ي-وفاپروريني
آيري محشر ائده جئك خلقه نمايان گله جئك
دوتاجاق قائمه عرشي او خواتون-ي-جزا
دييه جئك بار خدايا بو حسين بو شهدا
غفو قيل هركيم عزا ساخلاييب عالمده بونا
تعزيه داريلره مژده-ي-غفران گله جئك
انتقام ايسته جئك حضرت زهرا او زامان
تا معذب اولالار خصملري پير و جوان
خولي و حرمله و شئمر و عمرسعد و سنان
دمبدم اونلار اوچون شعله –ي-نيران گله جئك
كاتبا غم يئمه گر اولسا گناهون نه قدر
اولي شافع سنه اول پاده-ي-تئشنه جيگر
ثبت قيل دفتره محنتلريني شام و سحر
تا الينده محشر گوني عنوان گله جئك
بؤلوم : امام حسين(ع) یازار : hasanfatemefard 0 باخیش
اي شه مظلوم حسين واي واي
+0 به يه ن
شاعر : مضطر
اي شه مظلوم حسين واي واي
بي كس و مغموم حسين واي واي
كرب و بلا مولكي سنه عرشيدي
ايستي قوم اوستو قورو يئر فرشيدي
زينب ون اؤلسون بو نئجه نعشيدي
ائي شه –ي مظلوم حسين واي واي
اؤلدو بو صحراده علي اكبرون
ظولميله اوخلاندي علي اصغرون
قانه باتيب ظولميله گول پئيكرون
ائي شه –ي مظلوم حسين واي واي
قوم-ي-عدودن سنه وار دور گله
قلبيمه اود ووردو منيم حرمله
عرض ائده رم گر دوشه فورصت اله
ائي شه –ي مظلوم حسين واي واي
آل-ي-رسوله يئيشيب چوخ ستم
يانديريري قلبيمي بالله بو غم
اولموش علمدار قولو چون قلم
ائي شه –ي مظلوم حسين واي واي
قويدولا يالقيز سني قوم-ي-ظلم
ظولميله قانه بويانيبدي علم
قوللاري عباسين اولوبدور قلم
ائي شه –ي مظلوم حسين واي واي
بؤلوم : امام حسين(ع) یازار : hasanfatemefard 0 باخیش
تير باران حضرت سيد الشهدا بر روي ذوالجناح
+0 به يه ن
شاعر : مرحوم هادي تبريزي
تير باران حضرت سيد الشهدا بر روي ذوالجناح
*
شاه عطشاني عدو بس تير باران ائيله دي
دوالجناح اوسته ن سقوط اول شاه-ي-عطشان ائيله دي
وار يئري قان آغلاييب آهي چكم آه اوستونه
هر طرفدن يوز قويوب اعداي دين؛ شاه اوستونه
اوخ اوخ اوسته ن ياغديريبلار حجت الله اوستونه
سن دئمه حالين رعايت قوم-ي-دونان ائيله دي
تا وئره عزت شه دين؛ كربلا صحراسينه
آشنا ائتدي ترابي صورت-ي-زيباسينه
قتلگهده غرقيدي هرچند قان درياسينه
آننيني قويدو ترابه شوكر-ي-يزدان ائيله دي
درد-ي-عشقونده الهي واردي مين لرجه صفا
لوطف-ي-دردوندن تاپيب آيينه-ي-جانيم جلا
سن عنايت ائتدين اولدو عهديوه مندن وفا
تا شهيد انصاريمي بو قوم-ي-عدوان ائيله دي
لذّت-ي-ديداريله نه اصغريم نه اكبريم
افتخاريمدير يولوندا اولدو شان شان پئيكريم
دلخوشام بوندان كي عئشقونده اولوب قان بستريم
موشكل-ي-وصلي حسينه لطفون آسان ائيله دي
قادر-ي قهاريدن خوف ائتمه ييبلر بير زامان
دور –ي-شاهي آلدي يكسر شاميان و كوفيان
دللري مملوّ –ي-كينه الده شمشير و سنان
ائتديلر بير ظولم، زهرا آه و افغان ائيله دي
بؤلوم : امام حسين(ع) یازار : hasanfatemefard 0 باخیش
بو مشكه دگن اوخ مني مايوس ايلدي چوخ
+0 به يه ن
شاعر : مرحوم حسين شاني
زبان حال قمر منير بني هاشم
بو مشكه دگن اوخ مني مايوس ايلدي چوخ
اي كاش دگيدي گوزومه مشكه دگن اوخ
بستيدي حياتيم بو سووا جاندان اوسانديم
سو مشگيمه اوخ دگدي اوزوم جانه دايانديم
اصغر عطشه من شرر خجلته يانديم
اي كاش دگيدي گوزومه مشكه دگن اوخ
من جان بكفم وقفدي بو جانيم حسينه
يوخ باكيم ئولومدن ولي اي لشكر كينه
وير موشدي منه بو قوروموش مشگي سكينه
اي كاش دگيدي گوزومه مشكه دگن اوخ
گوردوم عطشندن سارالوب صورت اصغر
پوزدي پوزولان حالتيمي حالت اصغر
آز ياره ويرون بسدي منه خجلت اصغر
اي كاش دگيدي گوزومه مشكه دگن اوخ
چون اهل وفا كوي وفاده مني يوخلار
تصديق ويروب احسن ائدر عشقنه چوخلار
بير گلشن فردوس ايليوب سينمي اوخلار
اي كاش دگيدي گوزومه مشكه دگن اوخ
اوخ جسميمه مايلدي منيم من اوخا مايل
بو اوخ نيه بس گتدي خطا اولمادي حايل
مشگ اوسته دگوب زحمتيمي ايلدي زايل
اي كاش دگيدي گوزومه مشكه دگن اوخ
جان ويرماقا جانانه بوگون تا هوسيم وار
داد ائتسم حسينيم كيمي بير دادرسيم وار
عجز ايلمرم دشمنيمه تا نفسيم وار
اي كاش دگيدي گوزومه مشكه دگن اوخ
لايق دگيل هر چند بو جان بو باش حسينه
اما مني ايتميشدي آتام يولداش حسينه
من نوكرم هزگز دگلم قارداش حسينه
اي كاش دگيدي گوزومه مشكه دگن اوخ
چوخ سعي و تلاش ايلديم آخر اوز ايشيمده
قرديم نقدر دشمني بو بير يريشمده
قول گتدي ديرديم آپاروم مشگي ديشيمده
اي كاش دگيدي گوزومه مشكه دگن اوخ
تا سو اله گلدي غم و درديم آزاليشدي
مين همتيمون ضدينه بير تير آليشدي
سو آخدي گوزوم باخدي اورك ياندي آليشدي
اي كاش دگيدي گوزومه مشكه دگن اوخ
سو وعده سينه چونكه ديموشدوم گوزوم اوسته
تا سو واريدي من واريديم اوز سوزوم اوسته
قالسيدي سوقولسوز سورونرديم يوزوم اوسته
اي كاش دگيدي گوزومه مشكه دگن اوخ
مين جانيم اولا ويرماقا بير ذره يوخ اكراه
لازمدي اولا باشدا نثار قدم شاه
قول گتدي باشيم قالدي بو دور علت دلخواه
اي كاش دگيدي گوزومه مشكه دگن اوخ
بولمم يترم آخر عمرومده مرامه
لطفيله گلور شه اوزي ديدار غلامه
خوشدور بو باشي اوندا قويام پاي امامه
اي كاش دگيدي گوزومه مشكه دگن اوخ
هر چند چوخالدوقجا يارا خجليت آزالماز
اما آزالور اوخ چوخي مندن صورا قالماز
دشمنده قالان اوخ مگر آراممي آلماز
اي كاش دگيدي گوزومه مشكه دگن اوخ
چوخ سعي ايلديم من بو سووون حفظنه مطلق
شاهد سوزومه بو كسيلن الدي بو بيرق
مقصود دله اولماديم افسوس موفق
اي كاش دگيدي گوزومه مشكه دگن اوخ
(شاني ) اوزووي صدقيله بو درگهه سالدون
مقصود دلون حضرت عباسدن آلدون
صد حيف بير حسرتده او سرور كيمي قالدون
اي كاش دگيدي گوزومه مشكه دگن اوخ
بؤلوم : حضرت ابوالفضل(ع) یازار : hasanfatemefard 0 باخیش
