گلچين حسيني
چند شعر از كاتب در رساي حضرت ابوالفضل(ع)
+0 به يه ن
سينه زن – حضرت عباس
نام شاعر : كاتب اردبيلي
ديوان كاتب جلد دوم – ص 172
تئشنه لر ناله سي قارداش گتيريب جانه مني
وئر اجازه يولا سال جانب-ي-ميدانه مني
وار نه باكيم قوشونا يوخدو اگر حد-و-حئساب
الده كسگين قيليجيم واردي ركابيمده عئقاب
گر شياطين اولا بو قوم منه تير –و- شهاب
وئر اجازه يولا سال جانب-ي-ميدانه مني
هر قباييلده بيليرسن آديمين شؤهره تي وار
دوشمن و دوست بيلير منده علي صولتي وار
زاده –ي شير –ي-خدايم قولومون قوّتي وار
وئر اجازه يولا سال جانب-ي-ميدانه مني
ائذن وئرسن گئده رم دوشمنيله جنگ ائده رم
حيدرانه قوشونا عرصه گهي تنگ ائده ره م
خون-ي-اعداني تؤكوب بو چؤلو پررنگ ائده رم
وئر اجازه يولا سال جانب-ي-ميدانه مني
گر ايماميمده ن اولا اذن من-ي-خونجيگره
آچارام آب-ي-فراتين يولونو خئيمه لره
سو يتيرره م بو زامان عترت-ي-خيرالبشره
وئر اجازه يولا سال جانب-ي-ميدانه مني
نه روا سو يولونا عترتون حسرتله باخا
اذن وئر عباس عقاب اوسته چيخا
صفلري برهم ائده لئشگري اوست اوسته ييخا
وئر اجازه يولا سال جانب-ي-ميدانه مني
طاقتيم يوخدو گؤره م تئشنه علي اصغريمي
ائشيده م العطش عترت-ي-پئيغمبريمي
قويموشام من سو يولوندا ايكي اوزون اللريمي
وئر اجازه يولا سال جانب-ي-ميدانه مني
ديوان كاتب جلد دوم – ص 187
ييخيب دوشمنلريم قارداش مني ميدان آراسيندا
يئتيش فرياديمه قويما مني عدوان آراسيندا
گل ايندي گؤر علمداري
اولوب قاني سو تك جاري
خيامه سو گتيرمكده نه قدري سعي ائده ر ديم من
نه چاره اولمادي مومكون آليب اطرافيمي دوشمن
نه قول قالدي نه سو مشكيم، خجالت اولدوم اصغردن
دگيب ازبسكه اوخ جسميم قاليب پئيكان آراسيندا
سينيب شهپر دوچار اولدوم بو اعداي جفاجويه
قاليبدير گؤزلريم يولدا باخار حسرتله هر سويه
اوره كده مطلبيم واردور باخام بيرده او مه رويه
گل ايندي قويما عباسي غم-ي-هجران آراسيندا
باغيشلا خئيمه گاهه من گله نمه م سن گل ايمداده
ستمله كسمه گه باشيم اولوب قاتللر آماده
قوشون دريا تك هرياندان گلوب موجه بو صحراده
قاليبدير زورق-ي-جسميم اخا طوفان آراسيندا
شكايت ائتمه رم دوشمن ايكي قوللاريمي سالدي
مني بو يانديرير قارداش سكينه منتظر قالدي
او طفل-ي-مضطرون آخير سوسوزلوق طاقه تين آلدي
رضايم غيرتيمدن من وئره م جان قان آراسيندا
ديوان كاتب جلد دوم – ص 198
آچ گؤزلرون نظر قيل صاحب-ي-علم ابالفضل
جرات تاپيبدي سن سيز قوم-ي-ظلم ابالفضل
يالقوز گؤروب حسيني آلميش آرايه دشمن
گول جيسمينه وورارلار تير و سنان ابالفضل
هانسي لعين ستمله سو مشكون اوخلاييبدير
عطشان قاليب تماما" اهل-ي-حرم ابالفضل
سينديرديلار بئليمي يوخ طاقت –و –توانيم
هجرونده ائيله ييبلر قدّيمي خم ابالفضل
ديوان كاتب – ص 201
سالديلار قولوم قارداش
ساقيلا سولوم قارداش
تئز گل باشيم اوستونه
قوربانون اولوم قارداش
بؤلوم : حضرت ابوالفضل(ع) یازار : hasanfatemefard 0 باخیش
اشعار عرفاني مرحوم صراف تبريزي
+0 به يه ن
اشعار عرفاني مرحوم حاج رضا صراف تبريزي
وصل
من ترك شراب لب يار ائيلديم اولدي
زهر غم هجريله مدار ائيلديم اولدي
اي شيخ بهشتي دئمه ترك ائيلييه ن اولماز
من ترك سر كوي نگار ائيله ديم اولدي
اؤز جانيني ترك ائيليين اولماز من اؤزومدن
روحوم كيمي جاناني كنار ائيلديم اولدي
ممكن دگي بير محنته مين جان دؤزه اما
من جانيمي مين درده دچار ائيلديم اولدي
دانسته و فهميده خط و خاله ويريلديم
اؤز اؤز گونومو تيره و تار ائيلديم اولدي
هئچ كيمسه اؤزون خار و ذليل ايسته مز اما
من اؤز اؤزومو دهرده خار ائيلديم اولدي
عرفان نظربازي و رندي و ظريفي
عالمده خلاصه نه كي وار ائيلديم اولدي
صرافه دئديم حكمتيلن يوخ وار اولانماز
گولدي دئدي باخ گؤر يوخي وار ائيله ديم اولدي
***
تب عشق
چشم سيه يار دل پير ايلن اوينار
آهوي خطا ديديه باخ شير ايلن اوينار
سالميش اوزه تك خاليني يانديرسين حريفي
ليلاج دغل بازدي تدبير ايلن اوينار
آئينه ده اؤز عكسينه ياريم اولوب عاشيق
صورتگره باخ چكديگي تصوير ايلن اوينار
صبريم كسيلير عُمر آزالير محنتيم آرتار
فوج مژه تا غمزه، پي پير ايلن اوينار
روحيم اوچار از بس كي سيزيلدار دلِ زاريم
مطرب كيمي دستگاه بم و زير ايلن اوينار
اويناتماغا يوخ زولفون اگر اولما مكدّر
ديوانه اولان حلقه ي زنجير ايلن اوينار
مستانه گؤزون اوينادا قاش، ائتمه ملامت
ميخانه ده هر كيم قالا شمشير ايلن اوينار
تؤك خنجر ناز ايله قيزيل قانيمي، دورما
صياد هاچان توتدوغو نخجير ايلن اوينار؟
چوخ ائيلمه پيچ و خم و دستاريله بازي
قورخام ديه لر فتنه دي تزوير ايلن اوينار
اوينار تب عشق ايله وجودوم گئجه گوندوز
صراف دي گويا غم اكسير ايلن اوينار
***
وجوديم سر به سر تيترر
صبادان گول اوزونده سونبول زولفون اسَر تيترر
منيم صبريم تئلين خط باشي تك، ظالم كسر تيترر
گؤرنده پنجه مژگانيوي لرزان اولور كؤنلوم
بئله كيم چنگل شهبازا بير تيهو دوشر تيترر
نئجه خنجر دمينده مرغ بسمل اضطراب ائيلر
منيم كؤنلوم قوشي سندن اؤتور اوندان بتر تيترر
نگارا محفل وصل ايچره تمكين ايستَسن مندن
مگر سن بولميسن معشوقونا عاشق يئتر تيترر؟
سني گؤرجك نولور توپراغا دوشسم، بي قرار اولسام
يئتنده شمع اياغينا، سالار پروانه پر تيترر
اوجالسا آه سرديم، سينديرار لعل لبين پوسته
اسنده رسمدور باد سحر گولبرگ تر تيترر
تنيم اينجلدي مو تك بير سر مويونده بند اولدو
توكون ترپنسه اي جانا وجوديم سر به سر تيترر
گرك من تيتره يم، صراف تك تبدار عشق اولدوم
نئچون منبرده واعظ متصل سرسم دير تيترر!
***
شعله ي شمع
او سر زولفووه مشّاطه، پري شانه ويرار
چوخ ستمگردي پريشاني پريشانه ويرار
گؤرورم قتليمه آماده دي جلاد گؤزون
تُرك بد مست تك، ال خنجر برّانه ويرار
حلقه زولف گره گيري ده باغلاندي كؤنول
اؤز اؤزون گؤر نئجه زنجيره بو ديوانه ويرار
لوح رخساريوي دوتموش او خطا كار خطون
قويما بيگانه الين سيب زنخدانه ويرار
آلميسان يانوه گؤردوم گئجه رؤيادا مني
اؤزوم اؤز بختيمي بوللم، بو يوخي يانه ويرار!
لبلرون فكري منه قوت دل اولسا نه عجب
طعنه ياقوت لبون لعل بدخشانه ويرار
شيخ صنعان كيمي هركيمسه سني گؤردي دئدي:
عاقبت رخنه بو ترسا بچه ايمانه ويرار
ناوك غمزون ايچر قانيمي اي قاشي كمان
چشم مستون كيمي مخموردو، پيمانه ويرار
يانارام آتش هجرانووه باك ائيلمرم
شعله ي شمعه اؤزون رسمدي پروانه ويرار
زاهدون كفرينه عشقيم وئري فتواي صريح
كافر عشقه باخون، طعنه مسلمانه ويرار!
وار اميديم سالا صراف اله بير سرمايه
سكه عشقي ز بس نقد دل و جانه ويرار
***
جلوه حسن دوست
خلق ايچره وصل مجلسي نين گرچه آدي وار
اما فراق عالمي نين اؤزگه دادي وار
هر كيم اگر سؤال ائده بو سؤز فسانه دور
وئررم جواب اگر سؤزومه اعتمادي وار
روز وصال ياردا وار بيم هجر، ليك
چون صبحِ وصل، آيريليغين بامدادي وار
چون هجره يار طالب اولور، وصله اهل عشق
واضحدي يار سئوديگي نين آيري دادي وار
هر كيمده عشق اولا ائده جك جيلوه حسن دوست
عشقين هميشه حوسنله بير اتحادي وار
پيوسته بار غم چكرم چكمرم نفس
بير عمردور بو كش مكشين امتدادي وار
من درد عشقي گيزلده بيلمم بو شهرده
سئيلِ سرشك چشم تريم تك منادي وار
مندن يوزين دولاندورو گر ايستيم باخام
اؤز كؤلگه مين ده يوخسا من ايلن عنادي وار
آنلار بياز حوسن رخ يارده نه وار
هر كيمسه درس عشقده آز– چوخ سوادي وار
مجنون كيمي گرك دوشه صحرايه رسمدور
هر عاشقين كي دلبري ليلي نژادي وار
معشوقه جانون ايسته سه وئر، معتبردي چوخ
صراف نقد عشقي اله داد و ستادي وار
بؤلوم : اشعار عرفاني یازار : hasanfatemefard 0 باخیش
