گلچين حسيني
زبانحال امام حسين (ع) در سر نعش حضرت علي اكبر(ع)-اثر صراف
+0 به يه ن
زبانحال امام حسين (ع) در سر نعش حضرت علي اكبر(ع)
نام شاعر : مرحوم حاج رضا صراف تبريزي( صراف )
اي گـۆل كيمـي قانــه باتـان
اكبريم اوْيان، ياوريـم اوْيـان
قــان ايچــره نــازيـلـه يـاتـان
اكبريم اوْيـان، ياوريـم اوْيـان
خئيمه‌لره گلدي سسين
گلديم اوْلام دادرسين
اؤلمه‌ميسن وار نفسين
اكبريم اوْيـان، ياوريـم اوْيـان
اي كشته تيغ ستم
هئجرون ائديب قدّيمي خم
گؤز‌لر يوْلۇن اهل حرم
اكبريم اوْيـان، ياوريـم اوْيـان
شام ائتمه لئيلا گۆنۆزين
چوْخ منتظر قوْيما گؤزين
ايندي هلاك ائيلر اؤزين
اكبريم اوْيـان، ياوريـم اوْيـان
اي سرو گۆل پيرهنيم
باغ بهشت و چمنيم
سنسيز گۆلۆم سوْلدي منيم
اكبريم اوْيـان، ياوريـم اوْيـان
سن منه بير يوْلداش ايدون
آغلار گؤزۆمده ياش ايدون
هم اوْغۇل هم قارداش ايدون
اكبريم اوْيـان، ياوريـم اوْيـان
توْپراقلارا قوْيما يۆزۆن
گل منه رحم ائيله اوزون
آچ بيرجه بو قانلو گوزون
اكبريم اوْيـان، ياوريـم اوْيـان
گلديم جيگر داغلاماقا
اوْغۇل دئيوب آغلاماقا
گؤزلريوي باغلاماقا
اكبريم اوْيـان، ياوريـم اوْيـان
قالمێش اليم اۆسته اليم
باشه يئتوب چون اَجليم
صبر ائيله قوْي منده گليم
اكبريم اوْيـان، ياوريـم اوْيـان
تيغ جفا خامه كيمي
جسمون يازێب نامه كيمي
سنلن وارام شامه كيمي
اكبريم اوْيـان، ياوريـم اوْيـان
صرّاف دينار غمم
نقّاد نقد اَلمم
بۇ سؤزده ثابت قدمم
اكبريم اوْيـان، ياوريـم اوْيـان
بؤلوم : شاهزاده علي اكبر(ع) یازار : hasanfatemefard 0 باخیش
