گلچين حسيني
مناجات امام حسين (ع) با خدا-اثر صراف
+0 به يه ن
مناجات امام حسين (ع) با خدا
نام شاعر : مرحوم حاج رضا صراف تبريزي( صراف )
دۇتمۇشام جان نقدين الـده وصـل جـانان ايستـه‌ره‌م
تئشنه جان وئرره‌م ميناي عشقيده جان ايستـه‌ره‌م
دم به دم ائيلـه‌ر تجـلّا پــرتــو انــوار ذات
اوْلمارام موسي كيمي بير جلوه ايله محو وْ مات
خضــر تــك بــۇ عصـريده آختــارمارام آب حيات
تئشنه وصلم كؤنۆل جامين دوْلۇ قان ايسته‌ره‌م
تشت زر ايچره قێزێل قانێم آخار «يحيــي» كيمــي
كــربــلا ميــدانــي دوْلمــۇش قـانيلـه‌ن دريا كيمــي
زيـنبيــم اوْلســۇن پريشــان خاطـر ليلا كيمــي
پايبند زۆلف اكبردير، پريشان ايسته‌ره‌م
طاير اوج وفايم، شهپريم تير جفا
ائيلـه‌ره‌م روز ازلـده ائتـديگيــم عهـده وفا
بۇ لب عطشانيلـه‌ن اوْللام ذبيحـاً مـن قفا
خنجر قاتل دمينده‌ن آب حيوان ايسته‌ره‌م
گۆلشن جيسميمده زخم تير آچێلمێش گۆل كيمي
هر طرف پئيكان دۆزۆلمۆش سينه‌مه سۆنبۆل كيمي
ايستـه‌ره‌م گلسيـن سكينه‌م نالييه بۆلبـۆل كيمي
قتلگه گۆلزارينه مرغ خوْش الحان ايسته‌ره‌م
مين بلايه مُبتلا اوْلسام اگر ايّوب تك
ائيله‌ره‌م صبر، ائتمه‌ره‌م شور وْ نوا يعقوب تك
دم به دم، ساعت به ساعت، عاشئق مجذوب تك
بيــر بلايــه وئرمه‌گه شــوقيله منين جان ايسته‌ره‌م
كسـب ائـديـب مرآت انــوار محبّتلــه‌ن جلا
اوْلـمۇشــام سرمسـت جــام «البـلاءُ لِلـوِلا»
بــزم وحــدت‌دير منه بۇ سرزمين كـربلا
ترك كثرت ائتمه‌گه، بير نوك پيكان ايسته‌ره‌م
بير طرفده كاكُل اكبر بوْيانمێش قانيله
بير طرفده اصغريم سيراب اوْلۇب پيكانيله
بير طرف جان وئردي عبّاسيم لب عطشانيله
بير طرف اؤز جيسميمي خاكيله يكسان ايسته‌ره‌م
جلوه‌گاه محضرينده ائيله‌ره‌م سعي صفا
خئيمه‌گه ميقات وْ مَشعر، قتلگه كوه مِنا
ايسته‌ره‌م بير اكبر وْ عبداللّهيم اوْلسۇن فدا
بۇ بلا دشتينده يئتميش ايكي قۇربان ايسته‌ره‌م
شعله‌ي نار محبّتله دوْلۇب كانون دل
وادي حئيره‌تده ليلا آختارێر مجنون دل
مجليسيم خلوت، گؤزۆم ياشلێ، شرابيم خون دل
گلمه‌گه بۇ بزمه بير تازه مسلمان ايسته‌ره‌م
بير يئتيش فرياديمه، اي پادشاه كم سِپَه
زورق جيسميم اوْلۇب مستغرق بحر گُنَه
گرچه صرّافم ذليلم رو سياه
عرصه‌ي محشرده سنده‌ن الده فرمان ايسته‌ره‌م
بؤلوم : قتلگاه یازار : hasanfatemefard 0 باخیش
