گلچين حسيني
زبانحال رباب درباره علي اصغر(ع)-اثر صراف
+0 به يه ن
زبانحال رباب درباره علي اصغر(ع)
نام شاعر : مرحوم حاج رضا صراف تبريزي( صراف )
عطشان قـالێب گـۆل تك سـوْلان
لاي‌لاي اصغريم اي واي اصغريـم
اي قــان ايـچيـب سـيـــراب اوْلان
لاي‌لاي اصغريم اي واي اصغريم
كيم بئشيكده‌ن آلدێ يئرين
توْپراقلارا سالدێ يئرين
سينه‌مده بوْش قالدێ يئرين
لاي‌لاي اصغريم اي واي اصغريم
دهرين گۆلۆ سوْلسۇن اوْغۇل
سوْلسۇن خزان اوْلسۇن اوْغۇل
بي‌كس آنان اؤلسۆن اوْغۇل
لاي‌لاي اصغريم اي واي اصغريم
مني دئمه‌زديم آتاسان
قێرمێزێ قانه باتاسان
لاي‌لاي دئييم ياتاسان
لاي‌لاي اصغريم اي واي اصغريم
سن ياخشێ شيرين ديليدين
خوْش اوْخۇيان بۆلبۆليدين
گل آخيرينجي گۆليدين
لاي‌لاي اصغريم اي واي اصغريم
اوْخ سني بي‌تاب ائلهييب
آلوده-ي-خواب ائلهييب
قانيله سيراب ائلهييب
لاي‌لاي اصغريم اي واي اصغريم
اي تازه گۆل تازه نهال
حالين اوْلۇبدۇ حال به حال
خێردا بالام يات يۇخۇن آل
لاي‌لاي اصغريم اي واي اصغريم
سسله‌ر سني داد‌رسين
سس وئر اگر وار نفسين
اؤلمه‌ميسه‌ن نوْلدۇ سسين
لاي‌لاي اصغريم اي واي اصغريم
سينه‌م نه‌دن داغلامێسان
شيرين سۆده باغلامێسان
توْخسان مگر آغلامێسان
لاي‌لاي اصغريم اي واي اصغريم
بئيله خراب ائتمه مني
بي‌صبر-وْ-تاب ائتمه مني
ديل‌دن كباب ائتمه مني
لاي‌لاي اصغريم اي واي اصغريم
اي آهوي-ي-وادي-ي-شوق
بوْينۇندا وار رشته‌ي-ي-ذوق
قاندێر بۇ يا قێرمێزێ طوق
لاي‌لاي اصغريم اي واي اصغريم
من غرق-ي-بحر مُحنم
صرّاف-ي-شيرين سُخنم
دييه‌ن اؤزگه‌دير نه منم
لاي‌لاي اصغريم اي واي اصغريم
بؤلوم : شاهزاده علي اصغر(ع) یازار : hasanfatemefard 0 باخیش
