گلچين حسيني
حضرت مسلم(ع)
+0 به يه ن
نام شاعر : مرحوم سيد رضا حسيني(سعدي زمان)
او گون كه كوفه ده تك قالدي مسلم بن عقيل
هجوم ايدوب نه قَدَر كوفه نين جماعتي وار
گوروبله شير خدا يادگاري غيظه گَلوب
اَلينده ساغر، تيغينده مرگ شربتي وار
اجل پياله سي نوش ايلوري مبارز اولان
عموسي حيدر كرّار تك شجاعتي وار
خيال ايدوبله او شيري كمنديله دوتالار
كمنديسيز دوتا بُلمولّه چوخ رشادتي وار
قازوبلا حيله و مكريله بير بيوك گودال
ترحّم ايتمه ديلر دلده درد غربتي وار
او شير صولتي مكريله سالديلار او يره
عياندي حيله ده كوفي لرين مهارتي وار
قاچان قِييتدي هجوم ايتدي، هر گَلن ووردي
بيري بيرينه ولي وورماق اوسته سبقتي وار
قلج ووران، داش آتان، خنجره گماني گَلَن
ووراردي وورماقا گويا ثواب نيّتي وار
او قدر ووردولا دلدن دوشوب، باتوب نفسي
گوروبله كوفه ليلر انتقام فرصتي وار
قلجين آلديلار اَلدن، قولوني باغلاديلار
ايدوب هامي او كه دلخواه هتك حرمتي وار
آپارديلار نجه ابن زياد مجلسينه
ديمم، بُلر او كه اخباره خبريّتي وار
يِتيشدي بي يره دوردي، داياندي ديواره
ديدي منه گوره سن بير كسين حمايتي وار؟
ترحّماً من مظلومه بير ايچيم سو ويره
ياراليه عطشين فوقُ العاده زحمتي وار
سو ويرميوبله، ووروبلار علاوه دل ياراسي
گور اهل كوفه نين انصافي وار، مروّتي وار؟
يانيقلي سوزلري تاثير ايدوبدي بير نفره
ديدي پيمبريله مسلمين قرابتي وار
سو ايچسه ده اُله جاق بو غريب، ايچمَسه ده
سو ويردي، مسلم آلوب گوردي ميل و رغبتي وار
جگر حرارتيني ايسته دي ايده خاموش
آلار حرارت قلبي، سويون برودتي وار
سو كاسه سين يتوروب تا او قانلي لبلرينه
ايچَمندي، گوروب افعالين عكس صورتي وار
توكولدي ديشلري، قانيله دولدي سو جامي
ديمه سرين سودان عالمده بيرده قسمتي وار
حضور ابن زياده نجه گَلوب ديمَرَم
مگر بيان ايده بير كس او حالي جراتي وار
او مجلسين گِچورم ماجراي صحبتيني
آچوخ مصيبتي ذكر ايتماقين مذمّتي وار
صاقا صولا دولانوب باخدي ابن سعده ديدي
بو گون سنه بو غريبون نچه وصيّتي وار
منيم جنازه مي دفن ايله، قويما يره قالا
جنازه قالسا سنه خلق ايچينده خفّتي وار
ايكيمجيسي بودور اصنافِ شهره بُورجوم وار
او قرضه بو زره و تيغيمون كفايتي وار
اوچومجيسي بودي من نامه يازميشام آقاما
بو شهره گَلماقا اول نامه نين كنايتي وار
اماندي ياز اونا بو شهره يا حسين گَلمه
بو شهريده سنه اعدانون اكثريّتي وار
سوزين قوتاردي نماينده ي امام مبين
سفيره باخ، نجه سلطانه قصد قربتي وار
ويريلدي مسلمه دارُالعماره بامي مقام
ديمه كي كوفه نين اوندان اوجا عمارتي وار
او باميدن دولانوب باخدي بير حجازه طرف
صبا يِليندن او باخماقدا بير سفارتي وار
ديدي اماندي حسين گَلمه كوفيه بولارين
اوركده كينه سي وار، دللرينده نصرتي وار
سوزين ديوب او يانان سينه دن چكوب بير آه
اجل پياله سينين گوردي خوش سِقايتي وار
بدن يارالي، اوجا بام، بي حيا جلّاد
بخلدي بُلورم ا... بُلر نه حالتي وار
باشي كَسيلدي، بدن باميدن يره دوشدي
سبب او زحمتي دور چوخ جلال و رفعتي وار
عدو اَياقينه ايپ سالدي، كوچه ده سورودي
ديموبله بَسدي، بونون بير بيله جراحتي وار
وصيّت ايتميشيدي ابن سعد دفن ايلسون
وصيّتين نجه گور بير نقيض آيتي وار
يارالي پيكرينه اولدي بير بيوك توهين
نه قدر مُنتَقمين صبري وار عطوفتي وار
او شهري ايتدي حق لوط شهري تك بر باد
بو علّته كه علينون او يرده تربتي وار
ووروبلا مسلمي قصّابيلر قَناره سينه
او شهرين اهلينون افعال بَربَريّتي وار
قَناره لردن آسولّار گهي جفائيله
وجود مسلمي بُلموبله چوخ شهامتي وار
آسولّا گاه حسينون باشين باسولّا داشه
ديولّه بو باشا ظلم اولسا حق رضايتي وار
آچوب آقاشدان او باشي ايدوبله زيبِ جدا
دوروب جدا بويي گون زينبون قيامتي وار
حسيني كوفه ني باغ بهشته ايتمز عوض
چون اوردا سوگُلوسي مسلمين زيارتي وار
بؤلوم : حضرت مسلم(ع) یازار : hasanfatemefard 0 باخیش
