گلچين حسيني
خطاب به زمين مقدس طوس
+0 به يه ن
نام شاعر : سيدرضا حسيني متخلص به(سعدي زمان)
اي ارض طوس سنده عجب دلربا ياتوب
مرآت حق نما و جمال خدا ياتوب
بي اختيار مايل اولور دل وصالوه
سنده مگر بو كاه دله كهربا ياتوب
بالفرض روح شكّر اولا، سن بنفشه سن
ارواحي سنده جذب ايلين بير قوا ياتوب
سن سن عيار مسلّم و مومن لره محك
سنده عيار كامل اهل هدا ياتوب
ايلر زيارتون مس ايماني صاف زر
بير بوته سن كه سنده گوزل كيميا ياتوب
شمس الشّموس سنده دور اي مفخر فلك
سنده مهيله مهره ويرن انجلا ياتوب
اسلاميده عزيزدي سنده ياتان وجود
سن سن او ير كه سنده امام رضا ياتوب
پيغمبرين عزيزي، جگر گوشه سي رضا
باب الحوائج اوغلي قضايه رضا گلوب
سيناي واقعيدي سناباد ارض طوس
سنده كليم لم يزله مقتدا ياتوب
موسايه طوريده اولان انوار آشكار
سنده جفا اليله تاپوبدور خفا ياتوب
اي عرشدن گوزل ير، اوزي فرش زينتي
سنده سليل پاك شه هَل اَتي ياتوب
بير روضه سن رياض بهشت بريندن
يوخ يوخ بهشتيده سنده جلالت فزا ياتوب
افلاكيان چكه لّه تمام اشتياقيوي
سنده حبيب خالق ارض و سما ياتوب
درياي علم و حكمت بحر كمال و فضل
سن سن نه چون كه سنده دُر پربها ياتوب
اي گوهر يگانه ي پيغمبره صدف
سنده سرور سينه ي خيرالنّسا ياتوب
سن بير رئوف امامي آلوبسان كناريوه
اسلاميانه سنده اميد و رجا ياتوب
سنده جگرلري يارالي بير بزرگوار
اوز ايل قبيله سيندن اولوبدور جدا ياتوب
يرلرده يوخدي بير ير اولا شانيوه نظير
الّا او ير كه اوردا شه كربلا ياتوب
بير گل وار اوردا بلبلي ارواح انبيا
امّا ياراليوب اوني خار جفا ياتوب
عرش خدا چكر او يرين اشتياقيني
چون اوردا گوشواره ي عرش خدا ياتوب
بير قبر واردور عرش كيمي آلتي گوشه لي
واللهي اوردا آينه ي حق نما ياتوب
قربان اولوم او مدفنه كه اوردا قول بويون
بي غسل و بي كفن بير آتا بير بالا ياتوب
عرض ايلسم بهشت، بهشت ايلر افتخار
اوردا بهشته علّتِ خلقت آقا ياتوب
بير قبردور زيارتي ا... زيارتي
اوردا او كه فدادي اونا خون بها ياتوب
عريان يارالي پيكري باشدان باشا خدنگ
گويا خدنگيدن پر آچوب بير هما ياتوب
فرياد او وقتيدن كه باجي تاپدي قارداشين
گوردي بدنده وار نه عبا نه قبا ياتوب
باشين كسوبله نعشي قوم اوستونده چاك چاك
گلدن لطيف جسميده دورت مين يارا ياتوب
گويا كه بير طبق گلي اوراق ايدوبديلر
هر برگي اوز يرينده دوشوب جابجا ياتوب
نيزه قلج سنق لاري آلتندا گيزلنوب
پيغمبر اوغلي خامس آل عبا ياتوب
عريان گوروبدي رحم قيلوب ايليوب كفن
مرهم سالوب ياراسينا باد صبا ياتوب
معلوم اولور كسوب داليدان قاتلي باشين
نعشي دوشوب يوز اوسته، ذبيح القفا ياتوب
بولدي باشين كسن آپاروب كوفيه قوناق
امّا اولوبدي منزلي مطبخ سرا ياتوب
سسلندي دور باجون سنه قربان نه ياتموسان
هانسي يارالي سن كيمي بي اقربا ياتوب
هانسي شهين پوزوبلار سنون تك جلاليني
صاحب لواسي قانه باتوبدور، لوا ياتوب
كيم سو يانندا سن كيمي لب تشنه جان ويروب
جان اوسته سو يرينه ايچوبدور دِما ياتوب
هانسي شهين ئولنده سويوبلار جنازه سين
كيم سن كيمي بلايه ديوبدور بلا ياتوب
هانسي آتا يانندا سنون اكبرون كيمي
نورسته بير جوان اوزي گلگون قبا ياتوب
داماد ايدوبدي هانسي عمو قارداش اوغلوني
امّا ياخوبدي طويدا اله قان حنا ياتوب
واردور باشيمدا شور حسيني اودور سبب
ني تك سوزيمده پرده به پرده نوا ياتوب
بؤلوم : امام رضا(ع) یازار : hasanfatemefard 0 باخیش
