گلچين حسيني
اكبريه -اثر صابر
+0 به يه ن
نام شاعر : مرحوم ميرزا علي اكبر صابر(صابر)
باخدي چون اكبري‌نين نيزده ليلا اوزونه،
گوردي زلفي توكولوب چون شب يلدا اوزونه،
گلدي شوره دئدي: اي شمع شبستانيم اوغول،
يئتمه‌دين كام مراده مه تابانيم اوغول،
حشره تك ديلده قاليب چخمادي بو جانيم اوغول،
گلمه‌ييدي آنان، اي كاش، بو دونيا اوزونه
اي صبا! بيرجه اس، اول زلف پريشاني داغيت،
خانمان دل ويرانه‌ي ليلاني داغيت،
دلي ويرانه‌ي ليلا كيمي دونياني داغيت،
قويما دوشسون داخي اول زلف سمن‌سا اوزونه
چون كنار ائتدي صبا زلف شكن پر شكني،
گورونوب هاشمي خال ايله خط والحسني،
محو اولوب جمله‌سي توكدويئده دف، دائره‌ني،
بير باخيب اكبره، بير باخديلا ليلا اوزونه
قاشلارين طاغي اوغول سوره‌ي ياسين اوخويور،
باخسا هر كيم اوزونه آيه‌ي تحسين اوخويور،
اهل قرآندي بولار جمله‌سي «طا- سين» اوخويور،
نئجه چكديله قيلينج مظهر «طاها» اوزونه؟
دئديلر كيمدي بو عورت بيزي نالان ائله‌ين،
يوخسا ليلادي بو مجنون كيمي افغان ائله‌ين،
سني، اي تازه جوان قانينا غلطان ائله‌ين،
نئجه محشرده باخار حضرت زهرا اوزونه؟
ائتديلر چاه زنخدانينا حسرتله نظر،
زر خريد اولماق اوچون بير- بيرينه وئردي خبر،
توكدولر شمعِ زليخالاري چون اشك بصر،
باخديلار حسرت‌ايله يوسف بطحاء اوزونه
عارضين صفحه‌ي انجيل خداوند ودود،
نيزه باشيندا باشين هم اوخويور سوره‌ي هود
دئيه‌سن نيزه آياغيندا دوروب قوم يهود،
دارين اوستونده باخيرلار هامي عيسي اوزونه
مظهر حسننه عنبر رخ آليندي سنين،
آيه‌ي «شمس ضحا» مهر جماليندي سنين،
سوره‌ي «نون- قلم» هاشمي خاليندي سنين،
كاكلين پرده چكيب ليلة الاسرا اوزونه
باشداكي شور شهادتدي سنين تاجين اوغول،
عارضين كعبه، حرملر هامي حجاجين اوغول،
رفرفين نيزه مباركدي بو معراجين اوغول،
قاشلارين قبله‌دي «قوسين او ادني» اوزونه
گه اوزون آئينه‌ي مصحف و تورات و زبور،
آتش طور تجلّادي جماليندا ظهور،
مصر دير شام بو قبطي‌لره، يا وادي طور،
آل فرعون گليب باخماغا موسي اوزونه
«صابرا» هر ايل عزا ساخلا علي اكبره سن،
كربلاده گليب آغلا، او شهِ داوره سن،
گل قيامتده بو جمع ايله صف محشره سن،
قالما حسرت ايكي دونياده بو مولا اوزونه
بؤلوم : شاهزاده علي اكبر(ع) یازار : hasanfatemefard 0 باخیش
