گلچين حسيني
ميلاد امام رضا(ع)
+0 به يه ن
نام شاعر : مرحوم سيدرضا حسيني (سعدي زمان):
اي نسيم صبحدم مُردم ز درد اشتياق
رو به خاك طوس يعني قبله گاه نُه رواق
بوسه زن بر آستان قدس و آن گه عرضه دار
اي به قربان سگان كوي تو طال الفراق
***
ويردي باش چرخ امامتدن بو گون شمسُ الشّموس
قيلدي آفاقي منوّر طلعت سلطان طوس
اون ايكي تعيين اولوب قرآندا تعداد شهور
دورديني شهر الحرام ايلوب خداوند غفور
يعني حجّت اون ايكي، دوردي علي، مشكات نور
بو اوچومجي بير علي دينه تولّاسي رئوس
قدحيدور مدحينده عرض ايتسم جمالي ماهيدور
گون بو خورشيدين هواسينده غبار راهيدور
سرّي سرُّ ا...دور، وجهي جمالَُ ا...دور
پرده ي صبح ازلده نور آلوب بوندان عكوس
يوخ صفات و ذات حقّه فارق و فاصل نكات
ذاتي نور پاك حق، آئينه ي اوصاف و ذات
بحر قدرت، لنگر خلقتدي، كشتي نجات
ناخداي فُلك دين هنگام طوفان شئوس
خسف ايدر ير اهليني انسان كامل اولماسا
گوگ دايانماز بي ستون، معصوم حايل اولماسا
درك ايدر بو مطلبي هر كيمسه جاهل اولماسا
عالمه سائِسدي حجّت، حجّته عالم مَسوس
قلبه ي هفتم، امام هشتمِ اهل يقين
كلمه ي توحيده سگّيزمينجي شرط و اصل دين
كم ترين جاروب كش دربارينه روح الامين
آستانين اوپماقا حسرتده چرخ آبنوس
تا حجابات حريمي رفع ا... ايلدي
رشك طور آفاقي اوز نوريله ناگاه ايلدي
لَن تراني سرّينه موساني آگاه ايلدي
اولدي بو طوره كليم عشقِ ارواح و نفوس
قطب امكان، روح ايماندور، وليّ ذوالجلال
دفتر ايجاديده ديباچه ي فضل و كمال
نيّر شان عظيمي گورميوب گورمز زوال
گرچه خورشيدي زواله سوق ايدر ليل عبوس
نقل ايدوب نصّ پيمبردن ائمّه بير بيره
ايستيسن ا... لقاسين ضاحكه مستبشره
بو شهين اولسون تولّا نقطه سينده دايره
اولميان بو نقطيه پرگار ايدر آه و فسوس
حيف اولا بو شانيله غربتده چكدي چوخ بلا
ايلدي مامون نه جدّيندن نه زهرادن حيا
ويردي شاه اوليايه ظلميله زهر جفا
ايلسون غصب ايتديقي مسندده تا راحت جلوس
بُلمدي ايچسه شهادت جامي شاه دين رضا
گيسته دنيادن شهنشاه سرير ارتضي
قويماز آسوده امامين قاتلين امر قضا
گون به گون محصور ايلر كوكب بختين نحوس
تا سُرور سينه ي زهراني مسموم ايلدي
كون و امكاني باتوردي ياسه مغموم ايلدي
كربلا مظلومي تك بو شاهي مظلوم ايلدي
ير قرا گييدي بو غمدن، گوگ لباس سند روس
ايتديقي ننگين عملدن نادم اولدي اول دَني
گَلدي گوردي جان ويرور رحم و مروّت معدني
باشين آلدي دامنه عرض ايتدي يا مولا مني
قتله ايلور متّهم اسلام و ترسا و مجوس
بُلمورم من اوز عم اوغلوم حالينه قان آغليوم؟
يا بو خلقين تهمتيندن ايلوم افغان آغليوم
يا فراقوندان سنون عمريمجه هر آن آغليوم
سنسيز اولدي گون گوزيمده تار يا شمسُ الشّموس
آه يابالعسكري، اي شهريار ماسوا
گرچه قاتلدور گنه ماموندا وار شرم و حيا
كربلاده ايتمدي امّا حيا شمر دغا
جدّيوي اُلدوردي چالدوردي مباهاتيله كوس
تك نه جان ياره شهيد عشق تقديم ايلدي
اهل بيتينده بو يولدا ظلمه تسليم ايلدي
بير وفا درسي هامي عشّاقه تعليم ايلدي
صفحه ي عالمده كُهنلدي تعاليم و دروس
من كه مشهور اولموشام عالمده سعديّ زمان
كاش مشهور اولميِيديم اي شه عرش آستان
فضل بازارينده يوخدور مشتريدن بير نشان
گنج علمين ارزشي يوخدور بو دوره بير فلوس
رهرو عشقم اوز عشقيم گوسترن آئينيله
دلخوشام فرهاد تك بير صحبت شيرينيله
ايتمرم شاها عوش مين بوس حور العينيله
آستانون توپراقين ايتماقليقين بير دفعه بوس
بؤلوم : امام رضا(ع) یازار : hasanfatemefard 0 باخیش
