گلچين حسيني
خطاب جناب زينب به‌سر مطهر امام حسين(ع)
+0 به يه ن
نام شاعر: مرحوم سيد رضا حسيني(سعدي زمان)
نام نوحه : خطاب جناب زينب به‌سر مطهر امام حسين(ع)
نيزده قارداش باشون ايلور تجلّا زينبه
گوسترور هر جلوه‌سيندن مين تسلّا زينبه
پرتـو انــور حقـدن نـوك نيزه طوريدي
طورده موساني حيرتده قويان بو نوريدي
لفظ «اَرني»دن كليمه نور حق منظوريدي
«لَن» تَـراني سويلين اولموش هويدا زينبه
نيـزه‌ده باشـون گورن اي مظهـر حيّ وَدود
سويلوري عيسادي بو داره چكوب قوم يهود
شعلـه آهيلـه وورسا مشعل خورشيده دود
وار يري دُوردومجي گؤيدن باخسا عيسا زينبه
اي هـلالي زينبــون وي صـورتي بَدر تمام
ايله‌موشدون بو گيجه يوخسا كول اوستونده مقام
تازه آي تك گوسترولّر بير بيرينه خاصّ و عام
باشـووه خلـق ايلـور ايما باشون ايما زينبه
تئـز گليـدون پيشـوازه سـن گرك قالـدون گيجه
قالموشـام حيرتـده من بولمم گونـوزدور يا گيجه
گون ندور اولسا گيجه گوندوزدور آي چيخموش نيجه
اولساگر گوندوز ايدوب غم ليل يَلدا زينبه
اي هدايـت اهلينـه مصبـاح ذات ذوالمِنَن
نـه ديوم نـه چكموشم شام غريبانوندا من
روشن ايتموشدون گيجه خلوتگه اغياري سن
بير قرانلوق خيمه اولموشدي مصلّا زينبه
اي جمـال اللّهـه مَظهـر وجهي وجه باقيه
مينديروب عشقون مني قول باغلو عريان ناقيه
عشق اولا بـو باده عشقي ايچوردن ساقيه
ايله مست ايلوب گلور غملر گوارا زينبه
ايمدي تبليغات ايدوردوم خلقه اصل مذهبي
تاسسون گلدي گلوگير ايتدي غصّه زينبي
سن دانيش زينب دلون قرباني آندور مطلبي
خارجي آد قويماسون بو قوم اعدا زينبه
ايله محـو ايتـدون مني بير جلوه ديدارده
اوزلوقومدان خارج ايتدون مجمع اغيارده
باشون آردينجـا دولانّـام كوچه و بازارده
عالم عشقونده خوشدور هر بلايا زينبه
هاشميّانـه آچوبـلار ظلم اَلين اهل جفا
گه دوگولّر قيزلارون گاهي ديولّر ناسزا
بير نفر يوخ دادرس ناچار ايدولّر اِلتجا
گـه رقيّـه گـه سكينـه گـاه ليـلا زينبه
فكريمه ايتمزدي هيچ بو ماجرا قارداش خُطور
سن اؤلرسن زينبين باغلار قولون قوم شَرور
ايلـر اهـل كوفـه‌دن بـو پايه‌ده كينه ظهور
كف چالالار طعن ايدلّر دُخت‌زهرا زينبه
زينبون دينديرمسن دينديرمه قوي پژمرده حال
اوز قيزوندور فاطمه باري دانيشدير گوگلون آل
آز قالور قلبين اريتسون غصّه ايتسون ارتحال
بو صغيره دردي اولسون درد عُظمي زينبه
ايتمورم يالقـوز مـنِ بيخانمان ني‌‌تك نوا
هاردا بير اوغلي اؤلَن وار دلشكسته بينوا
ييِغميشام اطرافيمه منلن اولوبلار همصدا
آغلياندا سس ويرور بير دسته ثَكلا زينبه
ايلين گونلـر آتـام حيدر خلافت كوفه‌ده
خدمتيم اولموشدي اهل شهره عادت كوفه‌ده
ايمدي ايلولّر منه قارداش شماتت كوفه‌ده
تنگ اولوبدور چشم سوزن‌تك بو دنيا زينبه
ظاهـراً گــر چـه اسيرم دستگيرم بيقرار
باطناً امّا خوشام چون وار رضاي كردگار
صورت مكشوفه‌لـرده معنـي تـوحيدوار
بو اسـارت گوستـرور صورتده معنا زينبه
اي حسيني چوخ مقدّسدور بو زينب ساحَتي
غصّه‌دن مين ايل گيچوب عمرونده هر بير ساعتي
هر كيمون اولسا بيوك دردي چتين بير حاجتي
صـدق اوزيله يا حسينه آغلاسون يا زينبه
بؤلوم : حضرت زينب(س) یازار : hasanfatemefard 0 باخیش
